დღეს, 7 აპრილს, 11:30 საათზე, კულტურის, ძეგლთა დაცვისა და სპორტის სამინისტროში მინისტრის პირველი მოადგილე, დავით ცხადაძე გააკეთებს განცხადებას შოთა რუსთაველისა და საქართველოს ეროვნული პრემიის შესახებ.
როგორც ცნობილია, საქართველოს პრეზიდენტთან არსებული ხელოვნებისა და მეცნიერების დარგებში შოთა რუსთაველის სახელობისა და საქართველოს ეროვნული პრემიების კომისიამ გამოაცხადა კონკურსი 2010 წელს შოთა რუსთაველის სახელობისა და საქართველოს ეროვნული პრემიების მოსაპოვებლად. შოთა რუსთაველის სახელობის პრემიაზე განაცხადები მიიღება შემდეგ დარგებში: მხატვრული ლიტერატურა, მუსიკალური, კინო, სახვითი და თეატრალური ხელოვნება, არქიტექტურა, რუსთველოლოგია, სოციალური და ჰუმანიტარული მეცნიერებები.
შოთა რუსთაველის სახელობის პრემია გაიცემა არა უმეტეს სამისა, თითოეული 15.000 ლარის ოდენობით.
საქართველოს ეროვნულ პრემიაზე განაცხადები მიიღება შემდეგ დარგებში: მხატვრული ლიტერატურა, მუსიკალური, კინო, სახვითი და თეატრალური ხელოვნება, არქიტექტურა, ტელევიზია, პუბლიცისტიკა, კულტურული მემკვიდრეობა, საბუნებისმეტყველო მეცნიერებები, ჰუმანიტარული მეცნიერებები, მედიცინა, ტექნიკა.
საქართველოს ეროვნული პრემია გაიცემა არა უმეტეს შვიდისა, თითოეული 10 000 ლარის ოდენობით.
საკონკურსო განაცხადები და მასალა მიიღება საქართველოს კულტურის, ძეგლთა დაცვისა და სპორტის სამინისტროში 2010 წლის 23 აპრილის ჩათვლით, შაბათ-კვირის გარდა, 10.00 სთ-იდან 18.00 სთ-მდე.
კონკურსის საბოლოო შედეგები და ლაურეატთა სია გამოქვეყნდება არა უგვიანეს 2010 წლის 26 მაისისა.
