დღეს, 7 აპრილს, გაიხსნება საერთაშორისო მუსიკალური ფესტივალი "აღდგომიდან ამაღლებამდე". საერთაშორისო მუსიკალური ფესტივალის "აღდგომიდან ამაღლებამდე" სპონსორი წელსაც კომპანია "თელასი" იქნება.
როგორც "ჯი-ეიჩ-ენს" ფესტივალის ორგანიზატორებმა აცნობეს, მეხუთე საერთაშორისო ფესტივალი "აღდგომიდან ამაღლებამდე" 7 აპრილიდან 13 მაისის ჩათვლით გაგრძელდება. საიუბილეო ფესტივალის პროგრამა წარმოდგენილია ძირითადად კლასიკური მუსიკით. ფესტივალში მონაწილეობის მისაღებად საზღგვარგარეთ მოღვაწე წარმატებული ახალგაზრდა ქართველი შემსრულებლები არიან მოწვეული, რომელთა შორის არიან იანო-თამარ ალიბეგაშვილი - სოპრანო; თამარ ლიჩელი - ფორტეპიანო; ალექსანდრე მინდიაშვილი - ვიოლინო; მარინა და ნანა იაშვილები - ვიოლინო: ალექსანდრე ყანჩაველი - ფორტეპიანო და სხვები.
კულტურის მოღვაწეთა გამოსვლები თბილისის ვ. სარაჯიშვილის სახელობის სახელმწიფო კონსერვატორიის დიდ დარბაზში, შოთა რუსთაველის სახ. სახელმწიფო აკადემიურ თეატრსა და თბილისის დიდ საკონცერტო დარბაზში გაიმართება. ამასთან, ორ კონცერტს საქართველოს რეგიონები - საჩხერე (იმერეთის რეგიონი) და ახალციხე (სამცხე-ჯავახეთის რეგიონი) უმასპინძლებენ.
შეგახსენებთ, რომ კლასიკური მუსიკის ფესტივალი კათალიკოს-პატრიარქის საერთაშორისო საქველმოქმედო ფონდმა აკაკი რამიშვილის ფონდ "ტრადიცია და ინოვაციასთან" ერთად 2006 წელს დაარსა და მას შემდეგ ის ყოველწლიურად ტარდება.
