ბათუმის დელფინარიუმი და ზოოპარკი, რომლებიც შპს "შავი ზღვის ფლორისა და ფაუნის შემსწავლელ სამეცნიერო კვლევით ცენტრშია" გაერთიანებული, მართვაში ბათუმის მერიას დაუბრუნდა. ირკვევა, რომ კომპანია "მენეჯმენტ სერვისმა" ბათუმის დელფინარიუმის, 6 მაისი პარკის, ზოოპარკისა და სხვა მიმდებარე ინფრასტრუქტურის მოვლა-პატრონობაზე, რომლის მოვლა-პატრონობის უფლებაც 19 წლიანი ვადით ქონდა გადაცემული, უარი განაცხადა.
საკრებულოს "ნაციონალურ მოძრაობაში" ხელშეკრულების დარღვევის ფაქტს პოლიტიკურ კონტექსტში აფასებენ. გიორგი კირთაძის განცხადებით, კომპანია "მენეჯმენტ სერვისი" ბიძინა ივანიშვილის სახელთან არის დაკავშირებული და 6 მაისის პარკისა და დელფინარიუმის მოვლა ყოფილ პრემიერ-მინისტრს პოლიტიკური ქულების დასაწერად სჭირდებოდა. კირთაძის განმარტებით, აღნიშნული გადაწყვეტილება ადგილობრივ ბიუჯეტზე უარყოფითად აისახება.
" შავი ზღვის ფლორისა და ფაუნის შემსწავლელ სამეცნიერო-კვლევით ცენტრსა და კომპანია „მენეჯმენტ სერვისს" შორის 2013 წლის 11 იანვარს, 19 წლიანი ვადით გაფორმდა. თუმცა აღნიშნულმა კომპანიამ ხელშეკრულება დაარღვია და ქალაქის მუნიციპალიტეტს 2014 წლის 16 ოქტომბერს ახალი გადაწყვეტილების შესახებ აცნობა. დოკუმენტში კომპანია „ მენეჯმენტ სერვისს" აღნიშნული აქვს, რომ მან საზოგადოების ფუნქციონირებაში რაიმე დამატებითი სიახლის შეტანის შესაძლებლობა ამოწურა", აცხადებს გიორგი კირთაძე.
ბათუმის მერის მოადგილის ზურაბ ბერიძის განმარტებით კი ბათუმის მერიის მიერ შექმნილი ორგანიზაციები ბათუმის ბიუჯეტიდან უნდა ფინანსდებოდეს.
"იმის გამო, რომ დელფინარიუმი გადმოეცა ბათუმის მერიას, ამით არცერთ პროექტს დაფინანსება არ მოაკლდება. ეს არის პოლიტიკური რაკურსით დასმული საკითხი, რომელსაც არანაირი საფუძველი არ გააჩნია, რაც შეეხება „მენეჯმენტ სერვის"-ამ კომპანიამ 2013 წლიდან დღემდე 4 მილიონ ლარზე მეტი ინვენსტიცია განახორციელა დელფინარიუმში", აღნიშნა ავთანდილ ბერიძემ.
