საქართველოს მსოფლიოს 14 ქვეყნიდან ორდღიანი ვიზიტით ეწვევიან არარეზიდენტი ელჩები. ვიზიტის ფარგლებში ელჩები საქართველოს საგარეო საქმეთა სამინისტროში მინისტრის მოადგილეებს, დავით ჯალაღანიასა და თამარ ბერუჩაშვილს რწმუნებათა სიგელების ასლებს გადასცემენ.
გაიმართება მინისტრის მოადგილეების ინდივიდუალური შეხვედრები ელჩებთან, რომლის დროსაც მხარეები ორმხრივი თანამშრომლობის საკითხებს განიხილავენ. 31 ოქტომბერს ელჩები საქართველოს პრეზიდენტს გიორგი მარველაშვილს გადასცემენ რწმუნებათა სიგელებს.
ორდღიანი ვიზიტის ფარგლებში ელჩებს საქართველოს საგარეო საქმეთა მინისტრი, მაია ფანჯიკიძე სპეციალურად მათთვის გამართულ მიღებაზე შეხვდება. არარეზიდენტი ელჩებისთვის გათვალისწინებულია კულტურული პროგრამა, რომლის ფარგლებშიც ისინი ანსამბლ „რუსთავის" კონცერტს დაესწრებიან.
რწმუნებათა სიგელების გადაცემის შედეგად საქართველოში ახალი ელჩები ეყოლებათ ტაილანდის სამეფოს (რეზიდენციით ქ. ანკარა), ურუგვაის აღმოსავლურ რესპუბლიკას (რეზიდენციით ქ. ბუქარესტი), ქუვეითის სახელმწიფოს (რეზიდენციით ქ. ბუქარესტი), არგენტინის რესპუბლიკას (რეზიდენციით ქ. ანკარა), სამხრეთ აფრიკის რესპუბლიკას (რეზიდენციით ქ. კიევი), პაკისტანის ისლამურ რესპუბლიკას (რეზიდენციით ქ. ბაქო), პერუს რესპუბლიკას (რეზიდენციით ქ. ანკარა), მონღოლეთს (რეზიდენციით ქ. ასტანა), ეთიოპიის ფედერაციულ დემოკრატიულ რესპუბლიკას (რეზიდენციით ქ. ანკარა), ახალ ზელანდიას (რეზიდენციით ქ. ანკარა), ნორვეგიის სამეფოს (რეზიდენციით ქ. ბაქო), ესპანეთის სამეფოს (რეზიდენციით ქ. ანკარა), სლოვენიის რესპუბლიკასა (რეზიდენციით ქ. კიევი) და ზამბიის რესპუბლიკას (რეზიდენციით ქ. ანკარა).
