საქართველოსა და ეგვიპტის არაბთა რესპუბლიკის საავიაციო ხელისუფლებებს შორის რეგულარული საჰაერო მიმოსვლის თაობაზე ურთიერთგაგების მემორანდუმი გაფორმდა. მემორანდუმის შესაბამისად, მხარეებს უფლება აქვთ დანიშნონ ერთი, ან მეტი ავიასაწარმო მხარეთა ტერიტორიაზე პირდაპირი რეგულარული საჰაერო მიმოსვლის განხორციელების მიზნით. საქართველოს დანიშნულ ავიაკომპანიებს უფლება ექნებათ განახორციელონ რეგულარული სამგზავრო გადაყვანები ეგვიპტის არაბთა რესპუბლიკაში შემდეგი მიმართულებებით: Cairo luxor, Hurgada, Aswan, Sharm El Sheikh, Taba, St.Catherine, Marsa Alam, El Alamein, რაც შეეხებათ ეგვიპტის დანიშნულ ავიაკომპანიებს, ისინი ფრენების განხორციელებას შეძლებენ საქართველოს ტერიტორიაზე არსებულ ნებისმიერ პუნქტში.
სამოქალაქო ავიაციის სააგენტოში აცხადებენ, რომ ხსენებული მემორანდუმი საშუალებას აძლევს ქართულ ავიაკომპანიებს, რეგულარულად შეასრულონ რეისები საქართველოდან ეგვიპტის მიმართულებით. დღემდე მხარეთა შორის მხოლოდ ჩარტერული საჰაერო მიმოსვლა სრულდებოდა.