ქართული მოდის სამყაროს განვითარების ახალ ეტაპზე გადასვლის შესაძლებლობა მიეცემა. ეკონომიკის სამინისტროსა და „მეწარმეობის განვითარების სააგენტოს" ხელშეწყობით თბილისის მე-10 მოდის კვირეულს უცხოელი „ბაიერები" და ქართული სამკერვალო ფაბრიკების წარმომადგენლები დაესწრებიან. ამასთანავე ტურიზმის ეროვნული ადმინისტრაციისა და თბილისის მოდის კვირეულს შორის მოლაპარაკებების თანახმად, მოეწყო პრეს-ტური, რომლის ფარგლებშიც ჩვენ ქვეყანას და მოდის კვირეულსაც გააშუქებენ უცხოელი ჟურნალისტები ისეთი გამოცემებიდან როგორიცაა Grazia Italy, Harper's Bazaar (Russia & Kazakhstan), Buro 24/7, SNC Magazine, Wanderlust City guide, Interview Russia, NARGIS Magazine.
ამ თემაზე, 28 ოქტომბერს, „დიზაინ-ცენტრში" (დ. აღმაშენებლის 61) 11.30 საათზე, ვრცლად ისაუბრებს ეკონომიკის მინისტრის მოადგილე ქეთევან ბოჭორიშვილი, რომელიც საერთაშორისო ბაიერებს და მედიას გააცნობს ქვეყნის საინვესტიციო კლიმატს, მთავრობის მიერ განხორციელებულ რეფორმებს, მიმოიხილავს საფეიქრო ინდუსტრიას საქართველოში და პრემიერ-მინისტრის მიერ ინიციირებულ სამთავრობო პროგრამას „აწარმოე საქართველოში".
მეწარმეობის განვითარების სააგენტოსა და ეკონომიკის სამინისტროს ხელშეწყობით, მოდის კვირეულზე წარმოდგენილი იქნება ქართული სამკერვალო ფაბრიკების Elselema, Unistyle LTD, Iveria Uniforms, Vogue, L.G.-მიერ შეკერილი ტანსაცმელი. ფაბრიკების ნაწილი უკვე მუშაობს უცხოური დამკვეთებისთვის. მათ შორის კომპანია „Elselema" ზამთრის ტანსაცმელს ისეთი ცნობილი ბრენდისთვის კერავს, როგორიცაა Moncler.
„ჩვენი მიზანია ქართველი დიზაინერების საქმიანობა ე.წ. „ბუტიკებიდან" სერიულ წარმოებამდე განვითარდეს და უფრო მასშტაბურ და წარმატებულ ბიზნესებად იქცეს, ამიტომ ვცდილობთ დავაკავშიროთ დიზაინერები და ქართული ფაბრიკები, რომლებიც წარმატებით მუშაობენ უცხოური ბრენდებისთვის.
ამასთანავე ექსპორტის ხელშეწყობის მიზნით ვეხმარებით ქართველ მწარმოებლებს დაამყარონ კონტაქტი პოტენციურ უცხოელ პარტნიორებთან და მომავლისათვის მიიღონ საერთაშორისო შეკვეთები. მოდის კვირეული შესანიშნავი საშუალებაა გავაცნოთ ქართველი დიზაინერები „ბაიერებს", ვაჩვენოთ ქართული ფაბრიკების შესაძლებლობები."-აცხადებს ქეთევან ბოჭორიშვილი.
