სასტუმროს მშენებლობისათვის აჭარის მთავრობა ინვესტორს ეძებს. ბათუმში, კახაბრის დასახლებაში მდებარე 5 000 კვ/მ და 9 028 კვ.მ არასასოფლო-სამეურნეო დანიშნულების მიწის ნაკვეთების საწყისი ღირებულება 1 მლნ 850 ათასი ლარია და მისი გასხვისება 23 ოქტომბერს ჩანიშნულ აუქციონზე იგეგმება.
პირობებიანი ელექტრონული აუქციონის მიხედვით, ინვესტორი ვალდებულია ნასყიდობის ხელშეკრულების გაფორმებიდან 7 თვის ვადაში მშენებლობის ნებართვა აიღოს და სამშენებლო პროცესიც დაიწყოს. ასევე, მშენებლობის ნებართვის მიღებიდან 8 თვის ვადაში სასტუმროს შენობის ნულოვანი ნიშნული და 18 თვის ვადაში სასტუმროს შენობის ძირითადი მზიდი და არამზიდი კონსტრუქციის მშენებლობა დაასრულოს.
ასევე ნებართვის მიღებიდან 38 თვეში არანაკლებ 100 ნომრიანი სასტუმრო კომპლექსის ააშენოს და ექსპლუატაციაში შეიყვანოს. ინვესტორს ვალდებულებად განესაზღვრება ასევე, პროექტში მინიმუმ 10 მლნ დოლარის ინვესტიციის განხორციელება.
აუქციონის პირობების თანახმადვე, ინვესტორი ვალდებულებას აიღებს, რომ სასტუმრო კომპლექსის ამოქმედებიდან 3 თვის ვადაში არანაკლებ 220 მოქალაქე დაასაქმოს, საიდანაც არანაკლებ 80%-ს უნდა წარმოადგენდეს საქართველოს მოქალაქეები.