მიმდინარე მაკრო-ეკონომიკური ფაქტორებისა და სამთავრობოს პოლიტიკის ფონზე, ექსპერტი ეკონომიკის საკითხებში ირაკლი ლექვინაძე არ გამორიცხავს, რომ წლის ბოლოს ინფლაციის მაჩვენებელმა ისევ მოიმატოს.
როგორც ცნობილია, ბიუჯეტში ხარჯვითი ნაწილი ასათვისებელია, ხელისუფლების წარმომადგენლები კი ამბობენ, რომ იმით ვერ გადაიხარჯა ეს ფული, რომ გარკვეული ჯგუფები ტენდერებს მიზანმიმართულად შლიან.
"ჩვენ გვაქვს შარშანდელი გამოცდილება, როდესაც ბოლო 2 თვეში ფულის მასა ერთდროულად შევიდა მიმოქცევაში, რამაც გამოიწვია ჭარბი ლარი მიმოქცევაში და ვალუტის კურსის გაუფასურება. ეს კი, საბოლოო ჯამში, ფასებსა და ინფლაციაზე აისახა. თუ იგივე განმეორდა წელსაც, შედეგიც იგივე გვექნება. მე არ ვიცი, ეს მიზანმიმართულია თუ არამიზანმიმართული, ტენდერების ჩაშლას ვგულისხმობ, მაგრამ ის პრაქტიკა, რომელიც აქამდე არსებობდა, ტენდერების მოგების, აღარ არსებობს. კომპანიებს, რომელთაც გარანტირებული ჰქონდათ ტენდერების მოგება, სქემა ჰქონდათ აწყობილი შემდეგნაირად. ისინი ტენდერს იგებდნენ დაბალი ფასით _ მიმდინარე პროექტს მიმდინარე ფული არ ჰყოფნიდა, მაგრამ მთავრდება წინა პროექტი და იწყება ახალი. მერე კიდევ ახალი ტენდერი აფინანსებს წინას და აი, ეს პრაქტიკა აირია, როდესაც ახალი ხელისუფლება მოვიდა. ამიტომაც დადგა ბევრი ტენდერის რევიზიის საჭიროება. თუ ვინმე ამას შეგნებულად აკეთებს უნდა დაინტერესდნენ შესაბამისი სამსახურები, მაგრამ პრობლემა ისაა, რომ არსებული პრაქტიკა აღარ არსებობს.", აცხადებს გაზეთ "პრემიერთან" საუბრისას ლექვინაძე.
