აჭარის მთავრობამ ორ კომპანიას საინვესტიციო ვალდებულებების შესასრულებლად მშენებლობის ვადები გაუხანგრძლივა. აღნიშნულ საკითხზე დღეს რეგიონის მთავრობის საკითხზე მსჯელობდნენ. აჭარის ფინანსთა და ეკონომიკის მინისტრის დავით ბალაძის განმარტებით, ორივე კომპანიის ბიზნეს მიმართულება სასტუმრო სეგმენტის განვითარებაა.
"მშენებლობის ვადები გაუგრძელდა ორ კომპანიას, ესენია "სისთემ ინშაათი" და "მარი ჯგუფი" . ორივე კომპანიის მიმართულებაა სასტუმროს ბიზნესის განვითარება. თავის დროზე იყო ხარვეზები პროექტთან დაკავშირებით, რამაც გამოიწვია პროექტის გადაკეთება და პროექტის ცვლილება. აქედან გამომდინარე მოხდა ერთი კომპანიისთვის 6 თვით ვადის გადაწევა, ხოლო მეორე კომპანიისთვის 4 თვით",- აღნიშნა დავით ბალაძემ მთავრობის სხდომის დასრულების შემდეგ.
ქართულ-თურქული კომპანია "სისთემ ინშაათი" ბათუმში 5 ვარსკვლავიანი, 40 სართულიან სასტუმროს, ხოლო "მარი ჯგუფი" კი ოთხვარსკვლავიანი სასტუმრო ,,მარინა კოლიზეუმს" აშენებს. კოლიზეუმის ფორმის სასტუმრო 10-სართულიანი იქნება და მასში 108 ნომერი განთავსდება.
