საქართველოს ეკონომიკისა და მდგრადი განვითარების მინისტრის მოადგილე ირმა ქავთარაძე გერმანიის ბიზნეს-დელეგაციას შეხვდა, რომელსაც გერმანიის ეკონომიკისა და ენერგეტიკის ფედერალური სამინისტროს წარმომადგენელი მარგიტ შტეფელი ხელმძღვანელობს. შეხვედრა სასტუმრო „რედისონში" გაიმართა და მას საქართველოს ეროვნული საინვესტიციო სააგენტოს ხელმძღვანელი გიორგი პერტაია და ეკონომიკისა და მდგრადი განვითარების სამინისტროს ეკონომიკური პოლიტიკის დეპარტამენტის უფროსი ლალი ღოღობერიძეც დაესწრნენ.
მხარეებმა ორ ქვეყანას შორის ეკონომიკური ურთიერთობების საკითხებზე ისაუბრეს და განიხილეს ის ძირითადი მიმართულებები, რომლებიც განსაკუთრებით საინტერესო იყო გერმანული ბიზნესის წარმომადგენლებისთვის ინვესტიციების განხორციელების კუთხით. ირმა ქავთარაძემ სტუმრებს დეტალური ინფორმაცია მიაწოდა საქართველოში არსებულ ბიზნეს-გარემოზე, უკვე განხორციელებულ და მიმდინარე რეფორმებზე, ასევე ასოცირების ხელშეკრულებით ნაკისრი ვალდებულებებისა და ახალი საინვესტიციო შესაძლებლობების შესახებ. როგორც შეხვედრაზე გახდა ცნობილი, გერმანული ბიზნეს-დელეგაციის წევრები განსაკუთრებით დაინტერესდნენ საქართველოსთან თანამშრომლობით ისეთ სფეროებში, როგორიცაა მანქანა-დანადგარების წარმოება, სამრეწველო ობიექტების შექმნა, ლოგისტიკა, სოფლის მეურნეობა, ენერგეტიკა, ქიმიური მრეწველობა და კვების მრეწველობა.
გერმანული დელეგაციის საქართველოში ვიზიტი 18 ოქტომბრამდე გაგრძელდება. დაგეგმილია ორმხრივი შეხვედრები საქართველოში მოღვაწე ბიზნეს-კომპანიების წარმომადგენლებთან.
