საქართველოს ეკონომიკისა და მდგრადი განვითარების სამინისტროს, ქალაქ თბილისის მერიისა და საპარტნიორო ფონდის ინიციატივით, საქართველოს უძრავი ქონების ბაზრის კვლევა ჩატარდება. კვლევას საერთაშორისო საკონსულტაციო კომპანია "Colliers International" განახორციელებს, რომლის წარმომადგენლებმაც 16 ოქტომბერს სასტუმრო „თბილისი მარიოტში" კვლევის დეტალებისა და მიმართულების შესახებ პრეზენტაცია გამართეს.
ღონისძიებაზე სიტყვით გამოვიდნენ ეკონომიკისა და მდგრადი განვითარების მინისტრის მოადგილე ქეთევან ბოჭორიშვილი, თბილისის მერის პირველი მოადგილე ალექსანდრე მარგიშვილი და საპარტნიორი ფონდის თავმჯდომარის მოადგილე ნათია თურნავა.
ეკონომიკისა და მდგრადი განვითარების მინისტრის მოადგილის, ქეთევან ბოჭორიშვილის განცხადებით, „როდესაც ინვესტორებს და ადგილობრივ დეველოპერებს ვესაუბრებით, უმნიშვნელოვანესია, გამოვიყენოთ ზუსტი ციფრები, თუ რა ტენდენციებია დღეს ჩვენ ქვეყანაში და რა ტენდენციები იქნება სამომავლოდ".
უძრავი ქონების ბაზრის კვლევა 7 მიმართულებას მოიცავს. მათ შორის არის საცხოვრებელი, საოფისე და სასაწყობე ბაზრების, აგრეთვე სასტუმროების, საცალო ვაჭრობისა და გასართობი ინდუსტრიის მიმოხილვა. ასევე დაგეგმილია სახელმწიფო საკუთარებაში არსებულ მსხვილ ობიექტებზე „თიზერების" მომზადებას და სხვადასხვა ტურისტული დანიშნულების ადგილის შესახებ საინფორმაციო-საინვესტიციო ბროშურების დამზადებას, რაც სასტუმრო და გასართობი ინდუსტრიის უძრავი ქონების ბაზრის ეფექტური რეკლამირების საშუალებაა.
როგორც კომპანია "Colliers International Georgia"-ის ხელმძღვანელმა ირაკლი კილაურაძემ განაცხადა, კვლევა საქართველოს 14 ქალაქში ჩატარდება და მიმდინარე წლის დეკემბერში დასრულდება.
პრეზენტაციას დაესწრნენ უძრავი ქონების დეველოპერები, საკონსულტაციო კომპანიები და კვლევის საკითხით დაინტერესებული პირები.
