შვეიცარიიდან დაბრუნებული პარლამენტის საგარეო ურთიერთობათა კომიტეტის თავმჯდომარე თედო ჯაფარიძე პრემიერ-მინისტრის სპეციალური წარმომადგენლის რუსეთთან ურთიერთობის საკითხებში ზურაბ აბაშიძის მხრიდან მისი მისამართით გაკეთებულ განცხადებებს გამოეხმაურა.
ჯაფარიძე პოზიციას არ ცვლის და ამბობს, რომ მოლაპარაკებები რუსეთის საგარეო საქმეთა მინისტრის მოადგილესთან არ უნდა გამართულიყო.
„იმ ვითარებაში, როდესაც აფხაზურ მხარეს ხელშეკრულების პროექტი გადაეცა, მე რომ ვყოფილიყავი ქართული მხარის ადგილზე, თავს შევიკავებდი ამ რაუნდში მონაწილეობის მიღებისგან. მიუხედავად ამისა, ეს არის დიპლომატიის ერთ-ერთი ინსტრუმენტი და არ ნიშნავს იმას, რომ ჩვენ საერთოდ უარი უნდა განვაცხადოთ აღნიშნულ ფორმატზე," - აღნიშნა თედო ჯაფარიძემ.
საგარეო საქმეთა მინისტრის მოადგილე, დავით ზალკალიანი ზურაბ აბაშიძის გადაწყვეტილებას, მოლაპარაკებებში მონაწილეობის მიღების შესახებ, დადებითად აფასებს.
მინისტრის მოადგილეს მიაჩნია, რომ სწორედ არსებულ ფორმატში უნდა გააპროტესტოს ქვეყანამ ხელშეკრულება.
საქართველოს პრემიერ-მინისტრის სპეციალური წარმომადგენელი რუსეთთან ურთიერთობის საკითხებში ზურაბ აბაშიძე რამდენიმე დღის წინ პარლამენტის საგარეო ურთიერთობათა კომიტეტის თავმჯდომარის თედო ჯაფარიძის მიერ გაკეთებულ განცხადებას გამოეხმაურა, რომლის თანახმადაც ჯაფარიძე კოლეგებს აბაშიძე-კარასინის პრაღის მოლაპარაკებათა რაუნდში მონაწილეობისგან თავშეკავებისკენ მოუწოდებდა და აღნიშნა, რომ "ჩემს ძველ მეგობარს, ბატონ თედოს ჩემთვის რომ დაერეკა, მე მას მოვუყვებოდი და ავუხსნიდი თუ რატომ მივდივარ და რისთვის მივდივარ. მაგრამ ეტყობა ცოტა მუხრუჭებმა უღალატა და შეიძლება ცოტა ასაკობრივიც არის ეს ამბავი, რას იზამ".
