თურქეთის ქალაქ ჰენდეკში, ბეილიჯეს რაიონში ზოგადსაგანმანათლებლო სკოლაში, აფხაზური ენის სწავლება დაიწყო. ინფორმაციას ამის შესახებ ოკუპირებულ აფხაზეთში მოქმედი ე.წ. რეპატრიაციის კომიტეტი ავრცელებს. მათი ინფორმაციით, აფხაზური ენის მასწავლებელი ამ სკოლაში ვინმე ირფან ხოჯააა.
"მშობლიური ენის შესწავლის მსურველი კლასში 15 მოსწავლეა",- წერს აფხაზური მედია.
აფხაზური მედია აღნიშნული ინფორმაციის გავრცელებისას აღნიშნავს, რომ 2012 წელს თურქეთის პარლამენტმა მიიღო კანონი, რომლის მიხედვითაც ქვეყნის ზოგადსაგანმანათლებლო სკოლებში ეროვნულ უმცირესობებს მშობლიური ენის შესწავლის საშუალება ეძლევათ. ერთადერთი პირობა ამისათვის კი არის ის, რომ ენის შესწავლის მსურველი 10 ადამიანზე ნაკლები არ უნდა იყოს.
