_ ბატონო ნიკა, თბილისის მუნიციპალიტეტებიდან განთავისუფლებული თანამშრომლების აქციას მერიასთან თქვენც შეუერთდით. რა არის აქციის მონაწილეთა მთავარი მოთხოვნა?

_ მთავარი მოთხოვნა არის, რომ საატესტაციო პროცესს ჩამოშორდეს საატესტაციო კომისიის თავმჯდომარე ბატონი მარგიშვილი, ვიცე-მერი, რომლის უშუალო ხელმძღვანელობით ხორციელდება, პირდაპირ ვიტყვი, დანაშაულებრივი ზეწოლა თანამშრომლებზე, რაც ჩანდა აუდიოჩანაწერებში, რომელშიც ფიგურირებენ ზედამხედველობის სამსახურის უფროსი, მისი მოადგილე და ისნის რაიონის გამგებელი ბატონი ქიზიყურაშვილი.
მეორე მოთხოვნა არის, რომ გამოძიების დასრულებამდე ბატონი ქიზიყურაშვილი და ზედამხედველობის სამსახურის უფროსი, მოადგილესთან ერთად, ჩამოშორდნენ პროცესებს და გამოძიების დასრულებამდე უფლებამოსილება შეუჩერდეთ, რადგან შეუძლებელია, ეს ხალხი ინარჩუნებდეს მერიაში თანამდებობებს და ამ ფონზე ტარდებოდეს ატესტაცია.

ყველა სიკეთესთან ერთად, ამ ყველაფერს ემატება ტესტები, რომლებიც თავიანთ მეგობრებსა და ნათესავებს დაურიგეს მერიაში.
_ ეს ინფორმაცია უარყვეს და თქვეს, რომ ეს იყო სავარჯიშო ტესტები.
_ გეთანხმებით, მოგვიანებით უარყვეს და თქვეს, რომ ეს არის სავარჯიშო ტესტები, რაც არ შეესაბამება სიმართლეს. თუ ეს მართლაც სავარჯიშო ტესტები იყო, მაშინ ყველასთვის უნდა დაერიგებინათ და არა მხოლოდ 50-60 კაცისთვის.
ბატონი მარგიშვილი ვერანაირად ვერ იქნება ობიექტური, ვინაიდან მას პირდაპირ აქვს ანტაგონიზმი ყველა იმ თანამშრომლის მიმართ, ვინც წლების განმავლობაში მუშაობდნენ დედაქალაქის მერიაში. მათი ერთადერთი მიზანია, რომ დაასაქმონ ნათესავები. ეს ატესტაცია მხოლოდ ამას ემსახურება. თავიანთ პარტიულ აქტივისტებსაც კი არ ასაქმებენ, რომელშიც შეიძლება პროფესიონალები მოიძებნონ.
შეიქმნა საინიციატივო ჯგუფი, რომლის შემადგენლობაშიც შედის სამსახურიდან დათხოვნილი 7 ადამიანი. მათ სურდათ მერიის ხელმძღვანელობასთან შეხვედრა, რომ კონკრეტული ფაქტები წარედგინათ, მაგრამ არანაირი დაინტერესება არ აქვს ხელმძღვანელობას. მათ, როგორც ჩანს, იმედი აქვთ, რომ ეს აქციები შეჩერდება, მაგრამ პირიქით მოხდება _ ეს პროცესი შეუქცევადია. შეუძლებელია მათ დანაშაულებრივ ქმედებებზე თვალი დახუჭო. მათთვის არის უკეთესი, რაც შეიძლება დროზე მოეგონ გონს.
_ თუ მერიის ხელმძღვანელობა არ გაითვალისწინებს თქვენს მოთხოვნებს, აპირებთ, აქციები გააგრძელოთ?
_ ბატონმა ნარმანიამ რამდენიმე დღის წინ, ფაქტობრივად, დაადასტურა ის ზეწოლა, რომელიც თანაგუნდელების მხრიდან ხორციელდება, რომლებიც აუდიოჩანაწერებში ფიგურირებდნენ. მან ჯოხი გადატეხა შემსრულებლებზე _ სამსახურის უფროსებსა და გამგებელზე, როდესაც თქვა, რომ ორივე მხარე უნდა დაისაჯოს. აუდიოჩანაწერები მათ დანაშაულებრივ ქმედებებს ნათლად წარმოაჩენს. ეს პროცესი, რა თქმა უნდა, არ შეჩერდება და ძალიან მშვიდობიანი აქციების სახით, თოვლის გუნდას პრინციპით უფრო გაძლიერდება. შეუძლებელია ყველაფერზე თვალი დახუჭო. მათ თავიანთი თავი გააბეს მახეში და ამ მახიდან გამოსვლა ძალიან გაუჭირდებათ. ჩვენ ბოლომდე ვიბრძოლებთ იმისთვის, რომ ჩვენი სიმართლე გავიტანოთ და იმ ადამიანებს დავუდგეთ გვერდში, ვისაც სამსახურებიდან უსამართლოდ ათავისუფლებენ.

”ჯი-ეიჩ-ენი”,  მირანდა ჭარხალაშვილი