საქართველოში ევროპის საინვესტიციო ბანკის რეგიონული ოფისი გაიხსნება, - აღნიშნულის შესახებ განაცხადა ევროპის საინვესტიციო ბანკის (EIB) ვიცე-პრეზიდენტმა, ვილჰელმ მოლტერერმა საქართველოს ფინანსთა მინისტრთან შეხვედრისას, რომელიც ამერიკის შეერთებულ შტატებში, ქ. ვაშინგტონში ნოდარ ხადურის ვიზიტის ფარგლებში გაიმართა.
როგორც შეხვედრაზე აღინიშნა, ძალიან მნიშვნელოვანია, რომ ბანკის მხრიდან სწორედ თბილისიდან მოხდება რეგიონული პროექტების განხორციელება. „რეგიონული ოფისის გახსნით, შესაძლებელი იქნება EIB-ის გააქტიურება საინვესტიციო პროექტების დაფინანსების კუთხით როგორც სახელმწიფო, ისე კერძო სექტორში," - განაცხადა ფინანსთა მინისტრმა, ნოდარ ხადურმა.
შეხვედრაზე განიხილეს საქართველოს მთავრობის ეკონომიკური პოლიტიკა და ქვეყნის დახმარების გაგრძელების სამომავლო პერსპექტივა.
ევროპის საინვესტიციო ბანკი მნიშვნელოვან კაპიტალდაბანდებებს ახორციელებს, ისეთ სფეროებში როგორიცაა წყლისა და საგზაო ინფრასტრუქტურა, ენერგოსექტორი, სოფლის მეურნეობა, ჯანდაცვა და განათლება.
