2015 წელს აჭარაში წლის საუკეთესო რესტორანსა და სასტუმროს გამოავლენენ. დაჯილდოება ყოველწლიურ ხასიათს მიიღებს და ყოველ წელს საზოგადოებას წლის საუკეთესო რესტორნისა და სასტუმროს შესახებ ეცნობება. თავად ნომინანტებისა და საუკეთესო ობიექტის გამოვლენა კონკრეტული მეთოდით მოხდება. იდეა აჭარის ტურიზმის დეპარტამენტს ეკუთვნის და მისი განხორციელების შემდეგ, წლის „საუკეთესოს" ტიტულის მოსაპოვებლად კონკურენციის გამძაფრება და სერვისის უფრო დახვეწაა მოსალოდნელი.
იმავდროულად, აჭარის ტურიზმის დეპარტამენტში, ხარისხის ნიშნის შექმნაზეც მუშაობენ.
„დღეისათვის ტურისტულ აქტიობათა უმეტესობას, სტანდარტების კუთხით, კანონმდებლობა არ აკონტროლებს. ამ შემთხვევაში ყველაზე პრობლემატური არის განთავსების საშუალებები, კვების ობიექტები, ტურუსტული სააგენტოები, ლოჯისტიკა და გიდები. ანუ იმ მიმართულებებზე რაზეც ტურიზმი დგას, თითქმის არავითარი სტანდარტი ქართულ კანონმდებლობაში, არ არსებობს. რიგ შემთხვევაში გარკვეული კუთხით რაღაც სტანდარტი აკონტროლებს, თუმცა ის სათანადო დონეზე არ სრულდება. ვიდრე ჩვენ, ცენტრალურ ხელისუფლებასთან ერთად, ამ სფეროების დარეგულირებას მივაღწევს, მანამდე გვინდა, ჩვენი კომპენტენციის ფარგლებში ამ სექტორს ინფორმაცია მივაწოდოთ სტუმარ-მასპინძლობის ინდუსტრიის თანამედროვე პრინციპების შესახებ, რაც სჭირდება ტურიზმის მდგრად განვითარებას"- განმარტავს აჭარის ტურიზმის დეპარტამენტის თავმჯდომარის მოადგილე მამუკა ბერძენიშვილი.
