2015 წლის 1-ელი იანვრიდან აჭარაში ტურისტებს ახალი მეთოდით დაითვლიან, რომელზეც მუშაობა მიმდინარე წლის ბოლომდე დასრულდება. როგორც აჭარის ტურიზმის დეპარტამენტის თავმჯდომარის მოადგილე მამუკა ბერძენიშვილი აცხადებს, ახალი მეთოდის დამუშავებაზე, საერთაშორისო და ადგილობრივი ექსპერტების ჩართულობით, ინტენსიური მუშაობა მიმდინარეობს და ის 2014 წლის ბოლომდე უკვე მზად იქნება. ბერძენიშვილის განმარტებით, ახალ მეთოდოლგიაში გათვალისწინებული იქნება ე.წ. „ჩრდილოვანი ეკონომიკის" წილიც და სტატისტიკა მეტ-კანლები სიზუსტით იქნება წარმოდგენილი.
„ამ დროისათვის აჭარაში დაახლოებით14 ათასამდე სასტუმრო ადგილი გვაქვს. იგულისხმება ოფიციალური განთავსების ობიექტები, რომლებიც დარეგისტრირებულნი არიან საჯარო რეესტრში და იხდიან გადასახადებს. ამაში შედის როგორც სასტუმროს ნომრები, ასევე გესტჰაუსები და ჰოსტელები. დაახლოებით იმავე რაოდენობის ტურისტების განთავსება ხდება კერძო ბინებში და სახლებში . თუმცა აღნიშნულის შესახებ დაზუსტებული ინფორმაცია არ გვაქვს რადგანაც ეს ობიექტები ოფიციალურ განთავსების ადგილებად არ არიან დარეგისტრირებულნი და ცოტა ძნელია მათზე ინფორმაციის მოპოვება"- განმარტავს აჭარის ტურიზმის დეპარტამენტის თავმჯდომარის მოადგილე.
მამუკა ბერძენიშვილი ამბობს, რომ სტატისტიკის წარმოების მეთოდის შემუშავების შემდგომ, მასში უკვე გათვალისწინებული იქნება „ჩრდილოვანი ეკონომიკის" ნაწილიც.
„სპეციალური მეთოდები არსებობს, რათა მოვახერხოთ და ავღრიცხოთ ის სახლები, რომლებიც სტუმრებს ღებულობენ, თუმცა არ არიან დარეგისტრირებულნი", - აცხადებს ბერძენიშვილი.
