8 ოქტომბრიდან საერთაშორისო ელექტრონული კომერციის კომპანია PayPal-ი საქართველოში თავის მომსახურებას აფართოებს. ამის შესახებ ინფორმაცია საქართველოს ეროვნულ ბანკს PayPal-ის ოფიციალურმა წარმომადგენელმა დაუდასტურა. ცნობილია ისიც, რომ PayPal-მა მომსახურების ხელშეკრულებაში დაგეგმილი ცვლილებების შესახებ შეტყობინება სისტემის მომხმარებლებს წინასწარ, ელექტრონულ მისამართებზე უკვე დაუგზავნა.
ცვლილებების ძალაში შესვლის შემდეგ, მომხმარებელს, რომელიც საქართველოს მისამართზეა დარეგისტრირებული დამატებით ექნება შესაძლებლობა: მიიღოს საქონლისა და მომსახურების საფასურის გადახდები, ე.წ. „კომერციული გადახდები", როგორც ქვეყნის შიგნით ისე ქვეყნის გარედანაც. გამოიყენოს ავტომატური კონვერტაციის საშუალება იმ შემთხვევაში თუ გადამხდელისა და მიმღების ანგარიშები სხვადასხვა ვალუტაშია. ასევე, PayPal-ანგარიშიდან თანხა გაიტანოს საბარათე ანგარიშზე და სხვა.
„კომერციული გადახდების" მომსახურების ხელმისაწვდომობა, PayPal-ის მომხმარებელს საშუალებას მისცემს eBay-ის სავაჭრო პლატფორმაზე გაყიდონ თავიანთი საქონელი და მომსახურება და შესაბამისი ანაზღაურება მიიღონ Paypal-ანგარიშზე.
ჯერჯერობით კვლავ ნარჩუნდება შეზღუდვა პირადი გადახდების მიღებაზე.
