„უოლს სთრით ჯორნელის" ვრცელ რეცენზიაში მიმოხილულია აშშ-ში ამ დღეებში მიმდინარე ქართული კონოფილმების რესტროსპექტული ჩვენება, გამოთქმულია შეფასებები და კომენტარები ქართული კინოხელოვნების მნიშვნელობასტან დაკავშირებით (ავტორი - ქრისტიან ჯონსი).
„ქართული კინოს ისტორია ერთ საუკუნეზე მეტი ხნისაა. ქართულმა კინოხელოვნებამ მნიშვნელოვან წარმატებებს მიაღწია ჯერ კიდევ მუნჯი ფილმების შექმნის პერიოდში. იმდროინდელი ფილმები გვაოცებენ თავიანთი დინამიურობით და შესამჩნევი ანტისაბჭოურობით, კრიტიკული ხედვით და საოცარი პოეტურობით... ამასთან, ართული კინო საბჭოთა პერიოდში უცხოელი მაყურებლისა და ექსპერტებისათვის ნაკლებად ხელმისაწვდომი იყო, ამიტომ ბევრი შედევრი და ბევრი რეჟისორი უცხოელებისათვის დღემდე უცნობია", - ნათქვამია პუბლიკაციაში.
რეცენზიაში აღნიშნულია, რომ ქართული ფილმების რეტროსპექტული ჩვენება ამჟამად ყველაზე ვრცელი და ხანგრძლივია, რომელიც კი ოდესმე აშშ-ში გამართულა: ღონისძიება მიმდინარეობს ნიუ-იორკში (თანამედროვე ხელოვნების მუზეუმში), კალიფორნიაში (ბერკლის სამხატვრო მუზეუმში) და ხელოვნების სხვა ცენტრებში.
რესტროსპექტივა თემატურად ორ ნაწილადაა გაყოფილი: „ოჯახურ ფილმებად" და „ცისფერ მთებს მიღმა". პირველი სიმბოლურად მოიცავს ქართველ რეჟისორთა და მსახიობთა დინასტიების (ჭიაურელების, შენაგელაიების...) მიერ გადაღებულ ფილმებს, მეორე ცალკეული ნიჭიერი და გამოჩენილი რეჟისორების შედევრებს.
რეცენზიაში ვრცლადაა დახასიათებული ფილმები „ელისო", „მაგდანას ლუჯა", „ფიროსმანი", „მონანიება", „ცისფერი მთები ანუ დაუჯერებელი ამბავი", „იყო შაშვი მგალობელი" და სხვები.