თბილისის მუნიციპალიტეტის საკრებულოში ბიუროს სხდომა გაიმართა, რომელზეც თბილისის მერიის კეთილმოწყობის სამსახურის მიერ საკრებულოში შემოტანილი ქ. თბილისის 2014 წლის ბიუჯეტით გათვალისწინებული პროგრამების და ქვეპროგრამების ფარგლებში განხორციელებულ ღონისძიებებზე თანხმობის მიცემის საკითხები განიხილეს.
დღევანდელ სხდომაზე ურბანული დაგეგმარებისა და საქალაქო მეურნეობის კომისიის თავჯდომარის გოჩა ბაბუნაშვილის და გარემოს დაცვის კომისიის თავჯდომარის შორენა ბუხრაშვილის დასკვნები იქნა წარმოდგენილი.
სხდომას საკრებულოს თავჯდომარესთან და დეპუტატებთან ერთად ქ. თბილისის მერიის კეთილმოწყობის სამსახურის უფროსი ავთანდილ სუდაძე ესწრებოდა. სხდომა დებატების რეჟიმში წარიმართა. 54 პროექტიდან დეპუტატების უკმაყოფილება რამდენიმე საკითხმა გამოიწვია, რომელთაგან ერთ-ერთი დედაქალაქში პუშკინის ქუჩის გაგანიერებას ეხებოდა. როგორც ცნობილია, აღნიშნულ ადგილზე ისტორიული მემკვიდრეობის ძეგლი მდებარეობს, რომლის ზემოდან ესტაკადის აშენება იგეგმება. მერიის კეთილმოწყობის სამსახურს მხარი არ დაუჭირეს ნაციონალური მოძაობის დეპუტატებმა. სევდია უგრეხელიძის განცხადებით, იგი პუშკინის ქუჩაზე ესტაკადის მოწყობის წინააღმდეგია, ვიანიდან ამ ადგილზე არის ისტორიული ძეგლი, კერძოდ თბილისში შემოსასველი კედელი და გალავანი.
მისი განცხადებით, არსებობს საფრთხე, რომ ესტაკადის მშენებლობით ისტორიული მემკვიდრეობის ძეგლს ზიანი მიადგება.
კეთილმოწყობის სამსახურის უფროსმა ავთანდილ სუდაძემ ზემოაღნიშნულთან დაკავშირებით განაცხადა, რომ აუცილებლად უნდა მოხდეს სოლოლაკის უბნის განტვირთვა იმ საცობებისგან, რომელიც დღეს არსებობს. კოჯრის და ტაბახმელის მიმართულებიდან მოძრავი მანქანები სანაპირო ზოლზე მოსახვედრად ამ ტერიტორიას იყენებენ, სადაც უამრავი ავარიული სახლია. ეს კი აღნიშნულ შენობა- ნაგებობებს უარეს მდგომარეობაში აგდებს.
სევდია უგრეხელიძის საპასუხოდ ავთანდილ სუდაძემ განმარტა, რომ არანაირი საფუძველი იმისა, რომ ისტორიული ძეგლი რაიმე საშიშროების წინ დადგება, არ არსებობს. მითუმეტეს, რომ ამჟამად უკვე არსებობს უამრავი ტექნიკური საშუალება, რომლებიც უზრუნველყოფენ ძეგლის ხელშეუხებლობას. ამასთანავე, სამუშაოების ძირითადი ნაწილი ხელით უნდა შესრულდეს და თავისუფალ წერტილებში სადაც არის კულტურული მემკვიდრეობის ძეგლი, მოეწყობა ბურჯები და ლითონის კონსტრუქციებით აშენდება გადასასვლელი ხიდი. პროექტი წინაწარი მონაცემებით 2 მლნ. ლარამდე დაჯდება.
"წლევანდელ ბიუჯეტში არის თანხები, რათა ნაწილობრივ მოხდეს შესაბამისი შესყიდვების განხორციელება და ამ პროექტისათვის საჭირო დანარჩენის სახსრები კი უკვე იქნება მომავალი წლის ბიუჯეტში გათვალისწინებული",-განაცხადა ავთანდილ სუდაძემ.ამავე სხდომაზე დეპუტატებმა დიდი ლილოს მიუსაფართა თავშესაფრის პროექტიც განიხილეს, რომლის დასრულების შემდეგ აღნიშნული თავშესაფარი, რომელიც 240 ბენეფიციარზეა გათვლილი, ყველა სტანდრატთან შესაბამისი იქნება და მოქალქეებს კეთილმოწყობილ გარემოში ცხოვრება და ყველა აუცილებელი ინვენტარით სარგებლობა შეეძლებათ. ისინი ასევე სრულფასოვანი კვებით იქნებიან უზრუნველყოფილნი.