ლიტვის პრეზიდენტი დალია გრიბაუსკაიტე დარწმუნებულია, რომ დარწმუნებულია, რომ ვლადიმერ პუტინის აგრესია უკრაინით არ შემოიფარგლება და ის აუცილებლად წაიწევს წინ. განცხადება ამის შესახებ ლიტვის პრეზიდენტმა გაზეთ „Washington Post"-თვის მიცემულ ინტერვიუში გააკეთა.
„ჩვენ ვიყავით ყირიმის მოწმეები. სულ დასაწყისში ეს იყვნენ ე.წ. მწვანე კაცუნები, რომლებიც შემდეგ რუს ჯარისკაცებად გადაიქცნენ. ახლა იგივე ხდება აღმოსავლეთ უკრაინაში. მე დარწმუნებული ვარ, რომ ეს არ არის უკანასკნელი ტერიტორია, სადაც პუტინი აპირებს თავისი ძალის დემონსტრირებას",_ დარწმუნებულია ლიტვის პრეზიდენტი.
გრიბაუსკაიტეს აზრით, თუ დასავლეთი მომავალში ძალისნ რბილი იქნება სანქციების საკითხში ან ვერ შეძლებს მათ განხორციელებას, პუტინი წინ წაიწევს „მცდელობებში გააერთიანოს აღმოსავლეთ უკრაინა სამხრეთ უკრაინასთან და ყირიმთან".
მისივე თქმით, უკრაინაში სიტუაცია კვლავინდებურად სულ უფრო და უფრო უარესდება და რუსეთის ჯარი კიდევ მოქმედებს ქვეყნის ტერიტორიაზე.
„ეს კი იმას ნიშნავს, რომ ევროპა და მსოფლიო საშუალებას აძლევენ რუსეთს იყოს ქვეყანა, რომელიც არა მხოლოდ ემუქრება თავის მეზობლებს, არამედ იწყებს ომს თავისი მეზობლების წინააღმდეგ.
ეს იგივე საერთაშორისო ტერორიზმია, რომელსაც ჩვენ ვხედავთ ერაყში და სირიაში", _ აცხადებს დალია გრიბაუსკაიტე და დასავლეთს ადანაშაულებს იმაში, რომ ის არ იღებს დამატებით ზომებს იმისათვის, რომ უკრაინას დაეხმაროს.
"პრობლემა იმაშია, რომ დღეს პუტინის რუსეთი მზადაა და უნდა ომი. ევროპა და დასავლეთი არც არიან მზად და არც უნდათ ომი. ევროპაში და მსოფლიოში არ არიან ლიდერები რომლებსაც პუტინის შეჩერება შეუძლიათ",_ აცხადებს დალია გრიბაუსკაიტე.
