12 დეკემბერს, „HR პროფესიონალთა გილდია" საქართველოს შრომის, ჯანმრთელობისა და სოციალური დაცვის სამინისტროს, დასაქმების ხელშეწყობის სამმართველოს მხარდაჭერით, პირველად საქართველოში საუკეთესო HR პროექტს გამოავლენს. თუმცა მანამდე, პროექტის შესახებ დეტალურად 22 სექტემბერს, 11 საათზე სასტუმრო „თბილისი მარიოტში" გამართულ პრესკონფერენციაზე იმსჯელებენ.
ქვეყნის ბიზნესსექტორში ადამიანური რესურსების ეფექტური მართვის კუთხით განხორციელებული წარმატებული პროექტების დაჯილდოებით „HR პროფესიონალთა გილდია" HR პროფესიონალთა წახალისებასა და ადამიანური რესურსების მართვის თანამედროვე მეთოდების დანერგვის სტიმულირებას ისახავს მიზნად. საკონკურსო განაცხადების წარდგენა საქართველოში მოღვაწე HR პროფესიონალებს 26 სექტემბრიდან შეეძლებათ. საუკეთესო HR პროექტის ავტორები კი სხვადასხვა საინტერესო პრიზებთან ერთად, კვალიფიკაციის ამაღლებას მსოფლიოს წამყვან HR სააგენტოებში შეძლებენ.
"საქართველოს მსხვილი და საშუალო ბიზნეს სექტორისთვის ძალზედ მნიშვნელოვანია ადამიანური რესურსების მართვისა და HR პროფესიონალთა შესაძლებლობების სიღრმისეულად გააზრება ბიზნესის მდგრადობისა და შემდგომი განვითარებისთვის. ამისათვის, საუკეთესო საშუალებაა საქართველოს ბიზნეს სექტორში უკვე განხორციელებული პროექტებისა და მათი შედეგების შესახებ ინფორმაციის გასაჯაროება. აღნიშნული საშუალებას მისცემს ბიზნესს გაეცნოს იმ მატერიალურ სიკეთეს, რასაც მხოლოდ სწორად და პროფესიულად განსაზღვრული და წარმართული ადამიანური რესურსების მართვისა და განვითარების პოლიტიკის შედეგად შეიძლება დადგეს. შესაბამისად, საქართველოს ბიზნეს სექტორში უკანასკნელი სამი წლის პერიოდში განხორციელებული საუკეთესო HR პროექტის გამოვლენა კონკურსის გზით და უკვე აპრობირებული წარმატებული გამოცდილების საზოგადოებისათვის გაზიარება, ვფიქრობ, მნიშვნელოვანი ნაბიჯი იქნება აღნიშნულის მისაღწევად",- აცხადებს „HR პროფესიონალთა გილდიის" აღმასრულებელი დირექტორი, ადამიანური რესურსების მართვის ექსპერტი, სოციალურ მეცნიერებათა დოქტორი ლილი ბიბილაშვილი.
კონკურსში მონაწილეობის მსურველი კომპანია უნდა აკმაყოფილებლდეს შემდეგ პირობებს:
- კონკურსის თარიღისთვის პროექტი უნდა იყოს განხორციელებული და მისი შედეგი უნდა იყოს დამდგარი;
- პროექტი განხორციელებული უნდა იყოს HR-ის მიერ;
- კომპანიაში დასაქმებული უნდა იყოს მინიმუმ 50 თანამშრომელი;
- კომპანიას უნდა გააჩნდეს სხვადასხვა სტრუქტურული ერთეულები (გამართული მენეჯმენტ სტრუქტურა);
- კომპანიას უკანასკნელი 3 წლის მანძილზე არ უნდა ჰქონდეს სასამართლო შრომითი დავები.
კონკურში მონაწილე კომპანიებს წარმატებული პროექტების წარდგენა შეუძლიათ 2014 წლის 20 ოქტომბრამდე, წლის საუკეთესო HR პროექტის გამოვლენა კი სახელმწიფო, არასამთავრობო, საგანმანათლებლო სექტორის წარმომადგენლებითა და პროფესიონალი HR სპეციალისტებით დაკომპლექტებული საკონკურსო კომისიის მიერ მიმდინარე წლის 12 დეკემბერს მოხდება.