კავკასიელი მოჯაჰედების ამირის, ჩეჩენი მებრძოლის დოკუ უმაროვის სახელით განცხადება პირველი კავკასიური არხის ეთერში გაკეთდა. რომელშიც დოკუ უმაროვი აცხადებს, რომ მას დაქვემდებარებულ მებრძოლებს არავითარი კავშირი არა აქვს მოსკოვის მეტროპოლიტენში მომხდარ აფეთქებებთან .
მიმართვაში ასევე ნათქვამია, რომ მუსულმანებს და ჩეჩნებს კავკასიაში მიმდინარე ომი არ სჭირდებათ. განცხადებაში, რომელიც უმაროვის სახელით გავრცელდა ნათქვამია, რომ ჩეჩენი მებრძოლი მოსკოვის მეტროპოლიტენში მომხდარ აფეთქებებზე სრულ პასუხისმგებლობას რუსეთის სპეცსამსახურებსა და რუსეთის ფედერალური უსაფრთხოების სამსახურს აკისრებს. განცხადებაში ასევე ხაზგასმითაა აღნიშნული, რომ "მსგავსი აქციები ყოველთვის ტარდება იმისათვის, რომ რუსეთის ხელისუფლების რეიტინგი და პრესტიჟი აიწიოს".
აღსანიშნავია, რომ რუსული მედიის ინფორმაციით, როგორც კი უმაროვის სახელით აღნიშნული განცხადება გავრცელდა რუსეთის ხელისუფლების რეაქციამაც არ დააყოვნა. პირველი განცხადებით, რუსეთის უშიშროების საბჭოს მდივანი ნიკოლაი პატრუშევი გამოვიდა და მოსკოვის მეტროში მომხდარ აფეთქებებში "ქართული კვალის" შესაძლო არსებობის შესახებ დაიწყო საუბარი. მეორე განცხადება დუმის დეპუტატმა ვლადიმერ ჟირინოვსკიმ გააკეთა და მოსკოვის მეტროში მომხდარ აფეთქებებში ბრიტანული და აშშ დაზვერვები დაადანაშაულა.
"მოკლედ მოწმეები ჩვენებებს ერთმანეთში ურევენ და მთავარ ტერორისტად ვიღაც კაცი დაასახელეს რომელიც ძებნაში თურმე 2002 წლიდან იმყოფება. მოკლედ, 8 წელიწადია ვერ დაიჭირეს და არც ის იციან ზუსტად ეს მამაკაცი ცოცხალია თუ არა. თუმცა ის, რომ სწორედ მისი ორგანიზებული "ეს ყველაფერი" სამართალდამცავებმა "ზუსტად იციან". მეტიც, მათ მისი ფოტოც აქვთ, თუმცა იმის ნაცვლად რომ ეს ფოტო ყველა კუთხეში დაკიდონ მას მალავენ, _ წერს რუსული მედია.
