დაღესტნის ქალაქ ყიზლარში 35 წუთის ინტერვალით ორი აფეთქება მოხდა. ტერაქტის შედეგად გარდაცვლილთა რაოდენობა იზრდება. ბოლო ინფორმაციით გარდაცვლილია თერთმეტი ადამიანი და დაჭრილია შვიდი. გარდაცვლილთა შორის შვიდი სამართალდამცავი ორგანოების თანამშრომელია, ერთი რუსეთის ფედერაციის გენპროკურატურასთან არსებული საგამოძიებო კომიტეტის გამომძიებელი და ერთი ადგილობრივი მოსახლე. დაღესტნის შს სამინისტროს ინფორმაციით, ერთი ბომბი ტერორისტმა-თვითმკვლელმა ააფეთქა რომელსაც მილიციის ფორმა ეცვა.
პირველი აფეთქება ყიზლარში გამთენიისას მოხდა, სკოლის სიახლოვეს, წინასწარი ინფორმაციით, სავარაუდოდ გზისპირას მდგარი ავტომობილი "ნივა" აფეთქდა. მეორე აფეთქება კი უკვე მაშინ მოხდა, როდესაც პირველი აფეთქებს ადგილზე სამართალდამცავთა ოპერატიულ-სამძებრო ჯგუფი მუშაობდა. აფეთქება ტერორისტმა-თვითმკვლელმა განახორციელა. პირველი აფეთქების შემდეგ აფეთქების ადგილზე ხალხი შეკრიბა. დაახლოებით 15 წუთის შემდეგ მათ მამაკაცი მიუახლოვდა, რომელსაც მილიციის ფორმა ეცვა და თავი აიფეთქა.
გარდაცვლილთა შორის არის ადგილობრივი შს სამმართველოს უფროსი ვიტალი ვედერნიკოვი. წინასწარი ინფორმაციით, პოლკოვნიკი მეორე აფეთქების შედეგად გარდაიცვალა.
რუსეთის შს მინისტრმა რაშიდ ნურგალიევმა დაღესტანში მომხდარ აფეთქებებთან დაკავშირებით საგანგებო თათბირი მოიწვია, რომელზეც განაცხადა, რომ ყიზლარში მომხდარი ორივე აფეთქება ტერორისტმა-თვითმკვლელებმა განახორციელეს.
ნურგალიევმა აფეთქების შედეგად დაზარალებულთა ოჯახების დახმარებისა და დაღესტნის სასიცოცხლოდ აუცილებელი ობიექტების დაცვის გაძლიერების განკარგულება გასცა.
"ტერორისტებს ნებისმიერი სამიზნე სჭირდებათ. უნდა გაძლიერდეს სასიცოცხლოდ აუცილებელი ობიექტების, მათ შორის კინოთეატრების, სკოლების, კოლეჯებისა და უნივერსიტეტების დაცვა", _ განაცხადა ნურგალიევმა და დაღესტანში აღნიშნული აფეთქებების გამოსაძიებლად შს სამინისტროს საუკეთესო თანამშრომლების გაგზავნის განკარგულებაც გასცა.
მასალის გამოყენების პირობები
