მთავრობა ბიზნესს გარკვეული სახის სანქცია-საურავებისგან ათავისუფლებს. როგორც ფინანსთა სამინისტროში აცხადებენ, ჩამოწერას დაექვემდებარება შემდეგი სახლის დავალიანება:

2005 წლის 1 იანვრამდე წარმოშობილი და დღემდე გადაუხდელი საგადასახადო დავალიანება, თუ გადამხდელს შემდგომ პერიოდში აქტივობები არ უფიქსირდება;

ასევე, 2009 წლის 1 იანვრამდე წარმოშობილ აღიარებულ საგადასახადო დავალიანებაზე დარიცხული საურავი და 2009 წლის 1 იანვრამდე დარიცხული აღიარებული ჯარიმა, აღიარებული გადასახადის თანხის გადახდის პირობით, თუ პირს შემდგომ პერიოდში აქტივობები არ უფიქსირდება;

„განსაკუთრებით მნიშვნელოვანია, რომ მომზადებული ცვლილებების მიხედვით, ჩამოიწერება საკონტროლო სალარო-აპარატის გამოყენების წესების დარღვევისთვის ფიზიკური პირისათვის 2013 წლის 1 იანვრამდე დაკისრებული დარიცხული და გადაუხდელი ჯარიმა, რაც მნიშვნელოვანი შეღავათი იქნება ჩვენი მეწარმეებისთვის, განსაკუთრებით მათთვის, ვისთვისაც წინა წლებში დაკისრებული ჯარიმები მძიმე ტვირთად აწვებოდათ", - აცხადებენ ფინანსთა სამინისტროში.
შეგახსენებთ, რომ აღნიშნულს „საგადასახადო კოდექსში" შესატანი ცვლილებები ითვალისწინებს, რომლის განხილვასაც საკანონმდებლო ორგანო უახლოეს პერიოდში დაიწყებს.