საქართველოს პარლამენტი საგადასახადო კოდექსში ცვლილებების განხილვას იწყებს. ფინანსთა სამინისტროს ინფორმაციით,პარლამენტში განსახილველად უკვე შევიდა ფინანსთა სამინისტროს მიერ მომზადებული ცვლილებების პაკეტი, რომელიც „საგადასახადო კოდექსში" ცვლილებებს ითვალისწინებს. ახალი საკანონმდებლო ინიციატივა, თავის მხრივ ბიზნესის ხელშეწყობისა და სტიმულირებისთვის მნიშვნელოვან მექანიზმებს ითვალისწინებს.

„ახალი საკანონმდებლო ინიციატივა მიმართულია სამართლიანი და ეფექტური ადმინისტრირებისათვის საჭირო სამართლებრივი ბაზის შექმნისკენ, ჯარიმებისა და სანქციების შემდგომი ლიბერალიზაციისკენ", - აცხადებენ ფინანსთა სამინისტროში.

ცვლილებების შემუშავების პროცესში ჩართული იყო ბიზნეს-სექტორი და ბევრი ინიციატივა სწორედ მათი წინადადებებით მომზადდა. კანონპროექტის მიხედვით გათვალისწინებულია მნიშვნელოვანი ცვლილებები, მათ შორის:

შიდა გადამუშავებაში მოქცეული საქონლის გადამუშავებისთვის გაწეული მომსახურება თავისუფლდება დამატებული ღირებულების გადასახადისგან

(ცვლილებები ხელს შეუწყობს იმ ადგილობრივი საწარმოების განვითარებას, რომლებიც უცხოურ კომპანიებს უწევენ მომსახურებას. შეიქმნება კონკურენტუნარიანი გარემო ადგილობრივი ბიზნესისთვის. ამგვარი საწარმოების ხელმძღვანელებს შესაძლებლობა მიეცემათ დაზოგილი თანხები კვლავ ჩადონ ბიზნესის განვითარებაში, შექმნან ახალი სამუშაო ადგილები);

ჩამოწერას დაექვემდებარება:

2005 წლის 1 იანვრამდე წარმოშობილი და დღემდე გადაუხდელი საგადასახადო დავალიანება, თუ გადამხდელს შემდგომ პერიოდში აქტივობები არ უფიქსირდება;

2009 წლის 1 იანვრამდე წარმოშობილ აღიარებულ საგადასახადო დავალიანებაზე დარიცხული საურავი და 2009 წლის 1 იანვრამდე დარიცხული აღიარებული ჯარიმა, აღიარებული გადასახადის თანხის გადახდის პირობით, თუ პირს შემდგომ პერიოდში აქტივობები არ უფიქსირდება;

(განსაკუთრებით მნიშვნელოვანია, რომ მომზადებული ცვლილებების მიხედვით, ჩამოიწერება საკონტროლო სალარო-აპარატის გამოყენების წესების დარღვევისთვის ფიზიკური პირისათვის 2013 წლის 1 იანვრამდე დაკისრებული დარიცხული და გადაუხდელი ჯარიმა, რაც მნიშვნელოვანი შეღავათი იქნება ჩვენი მეწარმეებისთვის, განსაკუთრებით მათთვის, ვისთვისაც წინა წლებში დაკისრებული ჯარიმები მძიმე ტვირთად აწვებოდათ).

საგადასახადო დავალიანების გადახდა გადავადება მათთვის, ვისი საგადასახადო დავალიანების თანხა არ აღემატება 5 ათას ლარს (გადასახადის გადამხდელი უზრუნველყოფის საშუალებების წარდგენის გარეშე შეძლებს საგადასახადო დავალიანების გადავადებას ერთი წლით, თუკი თანხა არ აღემატება 5 000 ლარს. შედეგად, მცირე ბიზნესი შეძლებს საქმიანობის გაგრძელებას და საწარმოს განვითარებას).

მარტივდება ტურისტული საწარმოს საგადასახადო ვალდებულებების შესრულების მექანიზმები

(ცვლილებები ხელს შეუწყობს სასტუმრო ბიზნესის განვითარებას, ქვეყნის ტურისტული პოტენციალის გაძლიერებას. ტურისტული ბიზნესის განვითარების ფარგლებში ახალი ინფრასტრუქტურისა და სამუშაო ადგილების შექმნას)

ფინანსთა მინისტრისთვის საჯარო გადაწყვეტილების გამოცემის უფლებამოსილების მინიჭება

ცვლილების მიზანია, ფინანსთა სამინისტროს ტრანსპარენტულობა, საგადახადო კანონმდებლობის სადაო ნორმებზე ფინანსთა სამინისტროს პოზიციის საჯაროდ დაფიქსირება, საჯარო გადაწყვეტილების ინსტიტუტის რეალურად ამოქმედება, ბიზნესისათვის საგადახადო კანონმდებლობის სადაო ნორმებზე ფინანსთა სამინისტროს პოზიციის წინასწარ გაცნობა. აღნიშნული გადაწყვეტილება შეამცირებს საგადასახადო დავების რისკებს, მეწარმეს შეეძლება გაეცნოს ფინანსთა მინისტრის საჯარო გადაწყვეტილებას მისთვის აქტუალურ საგადასახადო ნორმასთან დაკავშრებით და იხელმძღვანელოს აღნიშნული გადაწყვეტილებით.

ცვლილებების მიხედვით, გადასახადების ადმინისტრირების მიზნით საქართველოს საერთაშორისო ხელშეკრულებების შესაბამისად და ასევე უცხო სახელმწიფოს უფლებამოსილი ორგანოს მიმართვის საფუძველზე საგადასახადო ორგანოს სასამართლოს გადაწყვეტილების საფუძველზე ბანკიდან პირის კონფიდენციალური ინფორმაციის გამოთხოვის უფლება ეძლევა.

(საქართველო არის ეკონომიკური თანამშრომლობისა და განვითარების ორგანიზაციის საგადასახადო მიზნებისათვის გამჭვირვალობისა და ინფორმაციის გაცვლის გლობალური ფორუმის წევრი, რომელიც ახორციელებს საქართველოს საკანონმდებლო ბაზის მიმოხილვას საგადასახადო საკითხებში გამჭვირვალობისა და ინფორმაციის გაცვლის საერთაშორისო სტანდარტთან მისი შესაბამისობის დადგენის მიზნით.

აღნიშნული სტანდარტის თანახმად, საგადასახადო ინფორმაციის გაცვლისათვის შემოსავლების სამსახურის უფლებამოსილ პირს უნდა გააჩნდეს ნებისმიერი პირისა თუ ორგანოსაგან, მათ შორის, ბანკებისა და ფინანსური ინსტიტუტებისაგან შეთანხმების პარტნიორი სახელმწიფოს მიერ მოთხოვნის შემთხვევაში, საჭირო ინფორმაციის მიღების უფლება.

დღეს მოქმედი კანონმდებლობით, არ არსებობს საგადასახადო ორგანოს მიერ საბანკო დაწესებულებისაგან ან სხვა ფინანსური ინსტიტუტისაგან კონფიდენციალური ინფორმაციის მოპოვებასთან დაკავშირებული სამართალწარმოების წესი. ცვლილებების მიზანია აღნიშნული ხარვეზის გამოსწორება; კანონპროექტი აწესრიგებს ვადებთან, მხარეთა უფლებებთან და მოვალეობებთან დაკავშირებულ საკითხებს, ხოლო საგადასახადო ორგანოს მიერ კომერციული ბანკებიდან ინფორმაციის გამოთხოვა შესაძლებელია მხოლოდ სასამართლოს გადაწყვეტილების საფუძველზე.