საქართველოს ფინანსთა მინისტრის ნოდარ ხადურის განცხადებით, 8 თვის მონაცემებით, ბიუჯეტის ხარჯვითი ნაწილი მნიშვნელოვნად ათვისებულია. მინისტრის განმარტებით, 8 თვის შედეგებით, გამოსწორებულია გრანტების ნაწილში დაფიქსირებული პრობლემაც.
"6 თვის შედეგებში გრანტებთან დაკავშირებითაც იყო გარკვეული პრობლემა, თუმცა ახლა ამ ნაწილშიც წლიური გეგმის თითქმის 90 პროცენტი უკვე შესრულებული", - განაცხადა მინისტრმა.
საქართველოს 2014 წლის სახელმწიფო ბიუჯეტით, გრანტების სახით მისაღები შემოსავლების გეგმა განსაზღვრულია 144,0 მლნ ლარის ოდენობით, მათ შორის, „საბიუჯეტო დახმარების" სახით მისაღები გრანტების გეგმა შეადგენს 30,0 მლნ ლარს, ხოლო კონკრეტული მიზნობრიობით გამოყოფილი გრანტების გეგმა შეადგენს 114,0 მლნ ლარს.
2014 წლის 8 თვის მონაცემების მიხედვით, გრანტების სახით მიღებული შემოსავლების მაჩვენებელი შეადგენს 127,3 მლნ ლარს, რაც წლიური გეგმიური მაჩვენებლის 88,4%-ს შეადგენს.
მიღებული გრანტებიდან 20,9 მლნ ლარი წარმოადგენს „საბიუჯეტო დახმარებას", ხოლო კონკრეტული მიზნობრიობით გამოყოფილი გრანტები 106,4 მლნ ლარს, საიდანაც 30,0 მლნ ლარამდე არის წლის განმავლობაში სამინისტროების და უწყებების მიერ მიღებული გრანტები.
''აბსოლუტურად უსაფუძვლოა ის განცხადებები, რაც გაკეთდა. თუ ნახავთ 8 თვის შედეგებს, სიტუაცია არის მნიშვნელოვნად შეცვლილი და ათვისების თვალსაზრისით ყველაფერი რიგზეა. რაც შეეხება ტენდერებს, სამწუხაროდ, ტენდერების ბუნებიდან გამომდინარე, ზოგიერთ შემთხვევაში, ხდებოდა შეფერხება, თუმცა სიტუაცია აქაც გამოსწორებულია," - აღნიშნა ფინანსთა მინისტრმა.