თბილისის მერი დავით ნარმანია, მერის რანგში პირველად, ევროპის რეკონსტრუქციისა და განვითარების ბანკის (EBRD) რეგიონული წარმომადგენლობის ხელმძღვანელს, ბრუნო ბალვანერას, მუნიციპალური ეკოლოგიური ინფრასტრუქტურის განყოფილების წარმომადგენელს, იოჰან ფრედჰოლმს და ბანკის სამუშაო ჯგუფს შეხვდა.
EBRD დედაქალაქის მთავრობას თბილისის მეტროსადგურებში ესკალატორების შეცვლის, ენერგოეფექტური გარე განათების, მყარი ნარჩენების გადამუშავებისა და ქალაქში პარკირების მოწესრიგების პროექტების დაფინანსებას სთავაზობს. ბანკი მზად არის, პროექტების განსახორციელებლად გრძელვადიანი, დაბალპროცენტიანი სესხი გამოყოს, საიდანაც თანხის ერთ მესამედი გრანტი იქნება.
თბილისის მერის, დავით ნარმანიას თქმით, გარე განათებისა და პარკირების მოწესრიგება მისი წინასაარჩევნო პროგრამის შემადგენელი ნაწილია. მისივე თქმით, შეთავაზებული წინადადებები ძალზე აქტუალურია, ბანკთან რამდენიმე მიმართულებით თანამშრომლობა კი - აუცილებელი, რადგან არსებული პრობლემების მოსაგვარებლად დედაქალაქის ბიუჯეტი არასაკმარისია და დონორებისგან ფინანსების მოძიებაა საჭირო.
თავის მხრივ, დავით ნარმანიამ ხაზი გაუსვა მუნიციპალური ტრანსპორტის ავტოპარკის ალტერნატიულ ენერგიაზე მომუშავე და ადაპტირებული ტრანსპორტით ჩანაცვლების აუცილებლობას, რისთვისაც, მისი თქმით, პირველ ეტაპზე საჭიროა ჩატარდეს შესაბამისი კვლევა. რაც შეეხება პარკირებას, როგორც თბილისის მერმა აღნიშნა, ქალაქის განსატვირთავად, აუცილებელია მიწისზედა და მიწისქვეშა პარკირების ინფრასტრუქტურის მოწყობა.
დავით ნარმანიამ ერთ-ერთ პრიორიტეტად ნაგავსაყრელების პრობლემის მოგვარება დაასახელა. მისი თქმით, გლდანისა და ლილოს ნაგავსაყრელები ვერ აკმაყოფილებს სტანდარტს და აუცილებელია ნაგვის გადამამუშავებელი ქარხნის აშენება. აღნიშნული საკითხის შესახებ კვლევის ჩატარებაზე EBRD-მა ინტერესი გამოხატა.
მისივე თქმით, სექტემბრის ბოლოს დაგეგმილია დონორთა საერთაშორისო კონფერენცია, რომელზეც დედაქალაქში არსებულ მდგომარეობაზე, მთავრობის ხედვებსა და პრიორიტეტებზე იმსჯელებენ.
შეხვედრაზე შეთანხმდნენ, რომ წარმოდგენილ წინადადებზე ორივე მხრიდან შექმნილი სამუშაო ჯგუფები იმუშავებენ.
აღსანიშნავია, რომ თბილისის მერია აქტიურად არის ჩართული EBRD-ის წლიური კონფერენციის მოსამზადებელ სამუშაო ჯგუფში, რომელიც 2015 წლის მაისში თბილისში უნდა გაიმართოს.