ქვეყნის ეკონომიკური განვითარების მინისტრის განმარტებით, „გლობალური კონკურენტუნარიანობის ინდექსში" (The Global Competitiveness Report) საქართველომ "ზომიერისა" და "დადებითის" კატეგორიების ზღვარზე გადაინაცვლა, ეს იმ ფონზე როცა ქვეყანა "უარყოფითსა" და "ზომიერის" კატეგორიების ზღვარზე იმყოფებოდა.
"144 ქვეყანს შორის საქართველოს რეიტინგმა 72-ე ადგილიდან 69-ე ადგილზე გადაინაცვლა. ეს არის "ზომიერი" რეიტინგის კატეგორია - ჩვენ ვიყავით "უარყოფითსა" და "ზომიერის" კატეგორიების ზღვარზე და გადავინაცვლეთ "ზომიერის" და "დადებითის" ზღვარისკენ. ეს არის მსოფლიო ეკონომიკური ფორუმის რეიტინგი, რომელსაც ის პერიოდულად აქვეყნებს. ამ რეიტინგის შედგებაში მონაწილეობენ მსოფლიო ბანკი, საერთაშორისო სავალუტო ფონდი და სხვა ძალიან მნიშვნელოვანი ორგანიზაციები. ჩვენი რეიტინგი გაუმჯობესდა მმართველობის ხარისხში, ასევე მოსახლეობის ჯანდაცვით უზრუნველყოფის კუთხით. სოციალური მიმართულებებით, ეფექტურობის და ტექნოლოგიურ ნაწილში, რა მიმართულებითაც ქვეყნის რეიტინგი მნიშვნელოვნად გაუმჯობესდა", - გიორგი განაცხდა კვირიკაშვილმა.
მსოფლიო ეკონომიკური ფორუმის უახლესი, 2014-2015 წლის „გლობალური კონკურენტუნარიანობის ინდექსის" (The Global Competitiveness Report) მიხედვით, საქართველო 144 ქვეყანას შორის 69-ე ადგილზეა (4,22-იანი ქულით). წლევანდელი ინდექსის მიხედვით, საქართველო საშუალოდ 3 პოზიციით დაწინაურდა, მას 2013-2014 წლის ინდექსის მიხედვით, 72-ე ადგილი ეკავა.
აღნიშნულ რეიტინგში, საქართველოს დაწინაურება განაპირობა შემდეგი ფაქტორების გაუმჯობესებამ:
- ძირითადი მოთხოვნები (Basic Requirements) - საქართველოს პოზიცია გაუმჯობესდა 9 საფეხურით და 57-დან 48-ე პოზიციაზე გადმოინაცვლა. კომპონენტზე გავლენა იქონია საქართველოს პოზიციის გაუმჯობესებამ შემდეგ მაჩვენებელში:
მაკროეკონომიკური გარემო - გაუმჯობესდა 13 პოზიციით და 61-ე ადგილიდან 48-ზე გადმოინაცვლა;
- ეფექტიანობის მასტიმულირებელი ფაქტორები (Efficiency Enhancers) - გაუმჯობესდა 7 პოზიციით და 86-ე ადგილიდან 79-ზე გადმოინაცვლა;
ტექნოლოგიური მზაობა (Technological readiness) - გაუმჯობესდა 1 პოზიციით და 68-ე ადგილიდან 67-ზე გადმოინაცვლა;
საფინანსო ბაზრის განვითარება (Financial market development) - გაუარესდა 1 პოზიციით და 75-ე ადგილიდან 76-ზე გადმოინაცვლა;
ბაზრის ეფექტიანობა (Goods market efficiency) - გაუმჯობესდა 7 პოზიციით და 67-ე ადგილიდან 60-ზე გადმოინაცვლა;
უმაღლესი განათლება და ტრეინინგი (Higher education and training) - იმავე პოზიციაზეა და ინარჩუნებს 92-ე ადგილს.
ინდექსის მაჩვენებლების მიხედვით საქართველოს ყველაზე პრობლემატურ საკითხად მიიჩნევა განათლებული მუშახელის შეუსაბამობა (Inadequately educated workforce) - 20,2 ნიშნული, ფინანსებთან ხელმისაწვდომობა (Access to financing) - 18,8; ინფრასტრუქტურის არასაკმარისი მიწოდება (Inadequate supply of infrastructure) - 10,4 და სხვა.
განვითარების შეფასების მიხედვით, საქართველოს კვლავ ეფექტიანობით მამოძრავებელი (Efficiency Driven) ქვეყნის სტატუსი აქვს.
გლობალური კონკურენტუნარიანობის რეიტინგში საქართველო წინ უსწრებს ისეთ ქვეყნებს, როგორიცაა - სლოვენიას (70-ე ადგილი), უკრაინას (76-ე ადგილი), ხორვატია (77-ე ადგილი), საბერძნეთი (81-ე ადგილი), მოლდოვა (82-ე ადგილი), და ა.შ. აღნიშნულ რეიტინგში პირველი ადგილი შვეიცარიას, ხოლო უკანასკნელი გვინიას უკავია. მიმდინარე წლის მოხსენება 144 ქვეყანას მოიცავს.
გლობალური კონკურენტუნარიანობის მოხსენება მსოფლიო ეკონომიკური ფორუმის მიერ ყოველწლიურად მზადდება. აღნიშნული მოხსენება იკვლევს ფაქტორებს, რომელებიც ეროვნული ეკონომიკის მდგრად განვითარებას უზრუნველყოფს. გლობალური კონკურენტუნარიანობის რეიტინგში გამოკვლეულია შემდეგი მაჩვენებლები: ინსტიტუციები, ინფრასტრუქტურა, მაკროეკონომიკური გარემო, ჯანდაცვა და პირველადი განათლება, უმაღლესი განათლება და ტრენინგები, ბაზრის ეფექტიანობა, შრომის ბაზრის ეფექტიანობა, საფინანსო ბაზრის განვითარება, ტექნოლოგიები, ბაზრის სიდიდე, ბიზნესი და ინოვაციები.
