4 სექტემბერს, საქართველოს ფინანსთა მინისტრის მოადგილემ დავით ლეჟავამ მონაწილეობა მიიღო საქართველოს ბანკის შვილობილი კომპანიის „გალტ ენდ თაგარტის" (Galt&Taggart) მიერ ორგანიზებულ ინვესტორთა პირველ კონფერენციაში, რომელიც საქართველოს ფასიანი ქაღალდების ბაზრის განვითარების პერსპექტივას მიეძღვნა.
კონფერენციის გახსნის შემდეგ ფინანსთა მინისტრის მოადგილემ ასევე მონაწილეობა მიიღო დისკუსიაში და მოკლედ ისაუბრა შიდა ფინანსური და კაპიტალის ბაზრების განვითარების ხელშეწყობის მიზნით მთავრობის მიერ გატარებულ ღონისძიებებზე.
„ძალიან მნიშვნელოვანია, რომ ინვესტორებს აინტერესებთ ჩვენი სამომავლო გეგმები. მეტი ინვესტიცია ნიშნავს ეკონომიკურ ზრდას, კეთილდღეობის ზრდას ქვეყანაში. განსაკუთრებით სასიხარულოა, რომ აღნიშნული კონფერენცია ტარდება არა მთავრობის, არამედ კერძო სექტორის ორგანიზებით. ეს ნიშნავს, რომ ბიზნესს ესმის, რამდენად მნიშვნელოვანია ქვეყანაში ეკონომიკური მდგომარეობის გაუმჯობესება. ეს მთავრობის, ბიზნესისა და მოქალაქეების საერთო ინტერესშია. ჩვენ გვქონდა ორმხრივი შეხვედრები ინვესტორებთან, რომლებიც დაინტერესებულები არიან საქართველოს ეკონომიკით, ფასიანი ქაღალდების ბაზრით. ამგვარი დიალოგი საშუალებას გვაძლევს მათ გავაცნოთ ჩვენი სამომავლო გეგები. იმედი გვაქვს, დაინტერესება კიდევ უფრო გაიზრდება და ამ შეხვედრების შემდეგ, მეტი მოთამაშე გაჩნდება საქართველოს ბაზარზე," - განაცხადა ფინანსთა მინისტრის მოადგილემ დავით ლეჟავამ.
