საქართველოს პრემიერ-მინისტრის ნიკა გილაურის განცხადებით, უმწეოთა შეფასების კრიტერიუმების გამარტივება შესაბამის მონაცემთა ბაზას "სერიოზულად არ შეცვლის".
ამის შესახებ ნიკა გილაურმა მთავრობის დღევანდელ სხდომაზე შესაბამის კანონპროექტზე საუბრისას განაცხადა.
"9 თვის წინ მივიღეთ გადაწყვეტილება, რომ უმწეოთა შეფასების კრიტერიუმები შეგვეცვალა. ამ ხნის განმავლობაში სოციალური უზრუნველყოფის სააგენტოს აგენტები სიღარიბის ზღვარს ქვემოთ მყოფ ოჯახებში საყოფაცხოვრებო ნივთებსაც, მათ შორის ფარდებს, ხალიჩებს და ნაჩუქარ ნივთებსაც აღწერდნენ, მაგრამ მათთვის ქულების მინიჭებისას ამ ნივთებს არ ითვალისწინებდნენ. როგორც აღმოჩნდა, ახალი პირობების დამკვიდრებით უმწეოთა მონაცემთა ბაზა არც თუ სერიოზულად იცვლება", - განაცხადა გილაურმა.
მისივე განმარტებით, სიღარიბის მეთოდოლოგიაში შესატანი ახალი ცვლილებებით ქულების მინიჭებისას საყოფაცხოვრებო ნივთები გათვალისწინებული აღარ იქნება. თუმცა, შესაბამისი სტატუსი ვერ მიენიჭება ისეთ პირებს, რომელთაც ფუფუნების საგნები მაგალითად, ავტომობილი და პლაზმური ტელევიზორი გააჩნიათ.
შეგახსენებთ, რომ უმწეოთა შეფასების კრიტერიუმები მარტივდება. მთავრობა შესაბამის კანონპროექტს დღევანდელ სხდომაზე დაამტკიცებს.
მასალის გამოყენების პირობები
