თბილისის მთავრობის 27 აგვისტოს სხდომის ერთ-ერთი მთავარი საკითხი 2014 წლის თბილისის ბიუჯეტში შესატანი ცვლილებები იყო. დავით ნარმანიას თქმით, თბილისის 2014 წლის ბიუჯეტი არასწორად იყო დაგეგმილი შემოსავლების ნაწილში არარეალურად მაღალი ტარიფები იყო ჩადებული. არარეალური იყო ქონების გადასახადის და პრივატიზაციის შედეგად მისაღები შემოსავლების მოცულობა, რისი მობილიზებაც ქალაქის ყოფილმა ხელისუფლებამ ვერ მოახერხა, შესაბამისად ბიუჯეტის საშემოსავლო ნაწილი მცირდება. მისივე თქმით, სრულად არის ამოწურული ჯანდაცვის და სოციალური, ასევე ბინათმესაკუთრეთა ამხანაგობებისთვის გათვალისწინებული ხარჯები, რის გამოც ბიუჯეტის ამ ნაწილში გადავიდა ზოგიერთი დაფინანსება, რათა შესრულდეს წლის ბოლომდე აღებული ვალდებულებები. „ბიუჯეტში დეფიციტია და თბილისის მერიას დაახლოებით 25 მილიონ ლარამდე თანხის სესხის აღება მოუწევს, რათა წლის ბოლომდე მოქალაქეებმა მიიღონ შესაბამისი სერვისები და განხორციელდეს სოციალური დახმარებები, დაფინანსდეს ოპერაციები და ის სოციალური პროექტები, რომლის შესრულების ვალდებულებაც დედაქალაქის ადგილობრივ ხელისუფლებას აქვს" - განაცხადა დავით ნარმანიამ. მისივე თქმით, თბილისის ბიუჯეტში არსებულ პრობლემებთან დაკავშირებით პასუხისმგებლობა პირველ რიგში, მერიის ყოფილ მმართველ გუნდს ეკისრება, რადგან ბიუჯეტი შედგა მერიაში და იმ ადამიანებს უნდა მოეთხოვოთ პასუხი, ვინც არარეალურად მაღალი ბიუჯეტი დაგეგმა.
დავით ნარმანიას შეფასებით, „პასუხისმგებლობა ეკისრებასთ ასევე იმ ადამიანებს, რომელებმაც წინასაარჩევნოდ საბიუჯეტო სახსრები, როგორც ადმინისტრაციული რესურსი გამოიყენეს და ამით კანონმდებლობა დაარღვიეს".
ამასთან, როგორც თბილისის მერმა განაცხადა, დაწყებულია წინასაარჩევნო დაპირებების შესრულება. მრავალშვილიან ოჯახებზე უკვე გაიცემა ფულადი დახმარებები; გაიზარდა დაფინანსება სოციალურად დაუცველთა კომუნალური გადასახადებისთვის, ასევე ბინათმესაკუთრეთა ამხანაგობების დაფინანსება. „თბილისის მერია ყველაფერს გააკეთებს იმისთვის, რომ მოსახლეობამ შეუფერხებლად მიიღოს ყველა აუცილებელი დახმარება"- განაცხადა დავით ნარმანიამ.
მთავრობამ ცვლილებები მოიწონა და ის განსახილველად საკრებულოს მომავალ კვირას გადაეგზავნება.