საქართველოს ფინანსთა მინისტრი ნოდარ ხადური, აჭარის მთავრობის თავმჯდომარე არჩილ ხაბაძე და აჭარის ფინანსთა და ეკონომიკის მინისტრი დავით ბალაძე საქართველოს და უკრაინის ფინანსთა სამინისტროების საგამოძიებო სამსახურების წარმომადგენლების სამუშაო შეხვედრას დაესწრნენ.
დელეგაციას უკრაინის სახელმწიფო საფინანსო სამსახურის უფროსის პირველი მოადგილე ვლადიმერ ხომენკო ხელმძღვანელობს.
დელეგაციის შემადგენლობაში არიან უკრაინის სახელმწიფო საფინანსო სამსახურის ფინანსური საგამოძიებო დეპარტამენტის უფროსი სერგეი სოლოდჩენკო, სახელმწიფო საფინანსო სამსახურის ფინანსური საგამოძიებო დეპარტამენტის უფროსის პირველ მოადგილე ივან კუცენკო და სახელმწიფო საფინანსო სამსახურის კორპორატიული ინტეგრირების დეპარტამენტის უფროსი სვიატოსლავ დუბინა.
უკრაინის დელეგაციას ქართველი კოლეგები ორმხრივი თანამშრომლობის ფორმატში მასპინძლობენ. ხვალ ფორუმს ფინანსთა მინისტრი ნოდარ ხადური გახსნის, სტუმრებს საგამოძიებო სამსახურის უფროსი ლერი ბარნაბიშვილი მიესალმება.
ოთხდღიანი სამუშაო შეხვედრების ფარგლებში უკრაინელი და ქართველი სამართალდამცველები ეკონომიკური და საგადასახადო დანაშაულის წინააღმდეგ ბრძოლის და საგამოძიებო თუ ოპერატიული მუშაობის პრაქტიკულ საკითხებზე, დანაშაულის გამოვლენის პროცესში მონაცემთა ბაზის, ინფორმაციული ტექნოლოგიების გამოყენების და სხვადასხვა ქვეყნის სამართალდამცველ უწყებებს შორის კოორდინირებული მუშაობის მნიშვნელობაზე ისაუბრებენ.
ქართველი სამართალდამცველები კოლეგებს განხორციელებულ სტრუქტურულ რეფორმებს და იმ საერთაშორისო სტანდარტებს გააცნობენ, რომლებიც ბოლო წლებში უწყებაში დაინერგა. უკრაინის დელეგაციის წევრებს ასევე გაუზიარებენ საგამოძიებო სამსახურის წარმატებულ პროფესიულ გამოცდილებას.
უკრაინის დელეგაციის წევრები ეწვევიან ბათუმის იუსტიციის სახლს, დაათვალიერებენ ბათუმის პორტს და გაფორმების ეკონომიკურ ზონას.
უკრაინის დელეგაცია ბათუმს დღეს ეწვია და 30 აგვისტომდე დარჩება
