აჭარაში ხილის გადამამუშავებელი საწარმო და სასაწყობე მეურნეობა აშენდება. როგორც აჭარის ფინანსთა და ეკონომიკის სამინისტროში განმარტავენ, საწარმო ქედაში აშენდება, რისთვისაც კომპანია "კახური ტრადიციული მეღვინეობა - აგრო ქედა" 1,2 მლნ ლარის ინვესტიციას განახორციელებს.
წინასწარ გაწერილი გეგმის თანახმად, საწარმო ექსპლუატაციაში 2014 წლის ბოლოდან შევა და სამომავლოდ წელიწადში არანაკლებ 220 ტონა ხილის გადამუშავებას შეძლებს.
საწარმოს მშენებლობისათვის ინვესტორმა ფართი სახელმწიფოსგან პირდაპირი მიყიდვის ფორმით 30000 ლარად შეიძინა. საპრივატიზაციო პირობების მიხედვით, "კახური ტრადიციული მეღვინეობა - აგრო ქედა" ვალდებულია ხილის გადამამუშავებელი საწარმოს ამოქმედებიდან 5 წლის განმავლობაში, საწარმოს პროფილი უწყვეტად შეინარჩუნოს და ასევე ამ ხნის განმავლობაში საწარმოში საქართველოს არანაკლებ 20 მოქალაქე დაასაქმოს.
ასევე "კახური ტრადიციული მეღვინეობა - აგრო ქედა" ვალდებულებას იღებს, რომ შესაბამისი ხელშეკრულების გაფორმებიდან 16 თვის ვადაში საკუთრებაში გადაცემულ უძრავ ქონებაზე სასაწყობე მეურნეობას მოაწყობს. უკვე ცნობილია, რომ სასაწყობე მეურნეობის მშენებლობაში ინვესტორი მინიმუმ 150 000 ლარის ინვესტიციას განახორციელებს. სასაწყობე მეურნეობაში სამომავლოდ მინიმუმ საქართველოს მინიმუმ 5 მოქალაქე დასაქმდება.
