დღეს, ფინანსთა სამინისტროში სოლიდარობის ფონდის პრეზენტაცია გაიმართა. ფინანსთა სამინისტროს თანამშრომლებს ფონდის მიზნებსა და ამოცანებზე ინფორმაცია მიაწოდა საქართველოს შრომის, ჯანმრთელობისა და სოციალური დაცვის მინისტრის მოადგილემ მარიამ ჯაშმა.
შეხვედრაზე აღინიშნა, რომ ფინანსთა სამინისტრო მზად არის აქტიურად ჩაერთოს ფონდის საქმიანობაში.
„ფინანსთა სამინისტრო მზადაა საქართველოს მთავრობას, ხოლო შემდეგ საქართველოს პარლამენტს წარვუდგინოთ კანონპროექტი, რომლის მიხედვითაც საშემოსავლო გადასახადისგან გათავისუფლდებიან ის ბენეფიციარები, რომლებიც მიიღებენ დახმარებას აღნიშნული ფონდისგან. ამასთან, ორგანიზაციები, რომლებიც შეძლებენ ნებაყოფლობითი ფასნამატის მოგროვებას და შემდეგ ფონდისთვის გადარიცხვას, გადარიცხული თანხა არ ჩაეთვლებათ ერთობლივ შემოსავალში და ისინი არ დაიბეგრებიან," - განაცხადა საქართველოს ფინანსთა მინისტრმა ნოდარ ხადურმა.
„საქართველოს სოლიდარობის ფონდისთვის უდიდესი იქნება ის მხარდაჭერა, რომელსაც მას უწევს ფინანსთა სამინისტრო. მნიშვნელოვანია, რომ სამინისტროს ინიციატივით, მზადდება კანონპროექტი, რომელის მიხედვითაც არ მოხდება ბენეფიციარების მიერ მიღებული თანხების დაბეგვრა, რისთვისაც მსურს მადლობა გადავუხადო ჩვენს კოლეგებს ," - განაცხადა შრომის, ჯანმრთელობისა და სოციალური დაცვის მინისტრის მოადგილემ მარიამ ჯაშმა.
მისი თქმით, დღეიდან „საქართველოს სოლიდარობის ფონდი" გამოაქვეყნებს განაცხადს აპლიკაციების მიღების პროცესის დაწყებასთან დაკავშირებით, ხოლო სექტემბრის პირველივე დღეებიდან მოხდება პირველი ბენეფიციარების დაფინანსება.
პირველ ეტაპზე, ფონდის დაფინანსების მისაღებად განაცხადების გაკეთება შეეძლებათ 18 წლამდე ასაკის სოლიდური სიმსივნეების მქონე ბავშვების ოჯახებს. შესაბამისად, სექტემბრის დასაწყისში რამდენიმე ბავშვი, რომელსაც ყველაზე მეტად ესაჭიროება დროული დაფინანსება, მიიღებს დახმარებას „სოლიდარობის ფონდის" მხრიდან.