მოძრაობა "სამართლიანი საქართველოსთვის" ლიდერის ზურაბ ნოღაიდელი ირალი მელაშვილის განცხადებას ეხმაურება და აღნიშნავს, რომ პოლიტიკაში მისი ადგილი არის თუ არა ეს "ეროვნული ფორუმის" გადასაწყვეტი არ არის.
"პოლიტიკაში ჩემი და კობა დავითაშვილის ადგილი არის თუ არა, ეს რომ ირაკლი მელაშვილის გადასაწყვეტი ყოფილიყო, ამ სფეროში ახლა არ ვიქნებოდი. მაგრამ არის ეს მელაშვილის გადასაწყვეტი ვითომ? არ ვაპირებ ამ საკითხზე არც ირაკლი მელაშვილთან და არც ირაკლი წერეთელთან კამათს. სააკაშვილის რეჟიმია დღეს საქართველოში მთავარი პრობლემა და ამ მიმართულებით გვაქვს სამუშაო", - განუცხადა ნოღაიდელმა ჟურნალისტებს მელაშვილის შესაბამის განცხადებაზე კომენტირებისას.
აღსანიშნავია, რომ ნოღაიდელს "კონსერვატორების" ლიდერი ზვიად ძიძიგურიც გამოესარჩლა და მელაშვილს "ნერვების დაოკება" ურჩია.
"ვინ უნდა იყოს ქართულ პოლიტიკაში და არის თუ არა რუსეთთან ურთიერთობა საჭირო, ამაზე გადაწყვეტილება ქართველმა ხალხმა უნდა მიიღოს და არც ერთ პოლიტიკურ ძალას არ აქვს უფრო მეტი წონა, ვიდრე საზოგადოებას. ჩვენი ვიზიტების დროს დასავლეთ საქართველოში გამოჩნდა, რომ მოსახლეობა მხარს უჭერს რუსეთთან ურთიერთობის კურსს. აქედან გამომდინარე, მინდა ყველას ვურჩიო, ნერვები დაიოკოს", - განმარტა ძიძიგურმა.
მასალის გამოყენების პირობები