ჩეჩნეთის პრეზიდენტი რამზან კადიროვი აცხადებს, რომ მოსკოვის მეტროში მომხდარი ტერორისტული აქტის ორგანიზატორებსა და შემსრულებლებს ქაოსის გამოწვევა, რუსეთის შიშის და უნდობლობის მორევში გადაგდება და მისი ეკონომიკის ჩამოშლა სურდათ.
"ამ ბოროტებასთან ბრძოლაში არავინ უნდა დარჩეს განზე. ეს ბოროტება არ არჩევს თავის მსხვერპლს ეროვნული, რელიგიური და რასობრივი ნიშნით. ტერორისტებისათვის მთავარი სისხლის დაღვრა, ხალხის დაძაბულობაში ყოფნა და სახელმწიფო მანქანის პარალიზებაა", _ აცხადებს კადიროვი, რომელიც მოსკოვის მეტროში მომხდარ აფეთქებებთან დაკავშირებით მიმართვას რუსული მედიის მეშვეობით ავრცელებს.
"რუსეთის ყველა ხალხისათვის ამ მძიმე დღეს, ჩვენ სრული პასუხისმგებლობით ვაცხადებთ, რომ გავაგრძელებთ ტერორისტებთან ბრძოლად მანამ ვიდრე ისინი განადგურებულნი არ იქნებიან. მხოლოდ ლაპარაკით ბოროტებას ვერ აღმოფხვრი. ამიტომაც მშვიდობიანი მოქალაქეების სიცოცხლის დასაცავად ბოევიკები იზოლირებულნი უნდა იყვნენ საზოგადოებისგან, ხოლო წინააღმდეგობის გაწევის შემთხვევაში ისინი უმოწყალოდ უნდა განადგურდნენ", _ ნათქვამია კადიროვის მიმართვაში და იქვე აღნიშნულია, რომ ჩეჩნეთმა მრავალი წლის განმავლობაში გამოსცადა თავის თავზე ის, თუ რა არის ტერორიზმი. "მაშინ ბანდიტების ხელიდან ათასობით ადამიანი განადგურდა".
"ჩეჩენი ხალხი გმობს ტერორიზმისა და ექსტრემიზმის ნებისმიერ გამოვლინებას. ჩეჩენი სამათალდამცავები მზად არიან მეტროში მომხდარი ტერაქტის გამოძიების საქმეში ჩაერთონ. ნებისმიერ დავალება ოპერატიულად იქნება შესრულებული. ჩვენ ვგლოვობთ რუსეთის ყველა მოქალაქესთან ერთად. დამნაშავეები კი კანონის მთელი სიმკაცრით უნდა იქნენ დასჯილნი", _ აცხადებს რამზან კადიროვი.
შეგახსენებთ, რომ მოსკოვის მეტროში დღეს დილით, 29 მარტს, ორი აფეთქება მოხდა. პირველი აფეთქება მეტროსადგურ "ლუბიანკაზე" 07:56 საათზე, მეორე კი "პარკ კულტურიში" 08:39 საათზე დაფიქსირდა.
აღნიშნულთან დაკავშირებით სამართალდამცავები უკვე რამდენიმე ვერსიას ამუშავებენ. მოსკოვის პროკურორის იური სიომინის განცხადებით, არ არის გამორიცხული, რომ აფეთქებები თვითმკვლელი ტერორისტების მიერ განხორციელებულიყო.
დაღუპულთა შესახებ ინფორმაცია ყოველ წუთს იცვლება. ამ დროისთვის 40-მდე გარდაცვლილის შესახებ საუბრობენ, რომელთა შორის არიან როგორც მეტროს მატარებელში, ისე სადგურის პლატფორმაზე მყოფი მოქალაქეებიც.
გარდაცვლილების გარდა არიან დაშავებულებიც. ამ დროისთვის მოსკოვის სხვადასხვა საავადმყოფოში 60-ზე მეტი მოქალაქეა გადაყვანილი. აღსანიშნავია, რომ მათი სამედიცინო დაწესებულებებში ტრანსპორტირება ვერტმფრენებით ხორცილდებოდა, რადგან რუსეთის დედაქალაქის ცენტრალურ ნაწილში გზები პარალიზებული იყო.
აღსანიშნავია, რომ მომხდარ აფეთქებებთან და გამოძიების მიმდინარეობასთან დაკავშირებით შესაბამისი უწყებების ხელმძღვანელებისგან ინფორმაცია უკვე მოისმინა რუსეთის პრეზიდენტმა დიმიტრი მედვედევმა.
სამშაბათი 30 მარტი მოსკოვში გლოვის დღედ გამოცხადდება.
მასალის გამოყენების პირობები