„საგადასახადო კოდექსში" ცვლილებების განხორციელების შემდეგ სამშენებლო კომპანია „ორბი ჯგუფის" ხელმძღვანელი ირაკლი კვერღელიძე, მშენებლობის სექტორში ბუმს მოელის. ბიზნესმენი აცხადებს, რომ ცვლილებები საქართველოში დამატებით ასეულობით მილიონი დოლარის ინვესტირების წინაპირობა გახდება.
„მინდა გითხრათ, რომ ზოგადად ტურისტული საწარმოს იდეა და უკვე მთავრობის მიერ ინიცირებული მოდელი არის უმნიშვნელოვანესი, არა მხოლოდ ბიზნესისთვის არამედ მთლიანად სახელმწიფოსთვის. „ორბი ჯგუფის" ვარაუდით, ეს არის საფუძველი საქართველოში რამდენიმე ასეული მილიონი დოლარის ინვესტიციების შემოსვლისათვის.
საქმე იმაშია, რომ მიდგომა დღევანდელი მთავრობის მიერ საშუალებას მისცემს ბიზნესს, რომ ნებისმიერ ტურისტულ ზონაში განახორციელოს ტურისტული ინფრასტრუქტურის შექმნა. ანუ ამ მოდელით საუბარია იმაზე, რომ ნებისმიერ მეწარმესუბიქტს უფლება და შესაძლებლობა აქვს შექმნას ტურისტული ობიექტები, სასტუმრო და მასთან დაკავშირებული სხვა ინფრასტრუქტურის სახით. მოახდინოს ამ სასტუმროში სასტუმრო ნომრების რეალიზაცია და დაიბრუნოს იგი სამართავად, შემდგომში სასტუმრო მომსახურების განხორციელების მიზნით. ეს ინტერესი არის „სამკუთხედი" - სამმხრივი ინტერესი სახელმწიფოს, ბიზნესის და მომხმარებლის. ვინაიდან მოცემულ შემთხვევაში კომპანია, რომელიც განახორციელებს ტურისტული ინფრასტრუქტურის შექმნას, სასტუმროს შექმნას, მისი შემდგომი რეალიზაციისა და მართვის მიზნით, მიწოდების დროისათვის გათავისუფლებულია დღგ-სგან. ეს არის საკმაოდ მნიშვნელოვანი შეღავათი კომპანიებისათვის, ხოლო თავის მხრივ ფიზიკური პირები, რომლებიც იძენენ სასტუმრო ნომრებს - აქტივს, აღნიშნულ ტურისტულ ობიექტებში მათთვის საშემოსავლო გადასახადის განაკვეთი განისაზღვრება 5 %-იანი ზღვარით"- აცხადებს ირაკლი კვერღელიძე.
ბიზნესმენის განმარტებით, აღნიშნული პროცესი საქართველოში გამოიწვევს მშენებლობის ბუმს, რადგანაც კონკურენტული იქნება ფასი და საკმაოდ კონკურენტული იქნება პირობები ნებისმიერ სხვა ქვეყნებთან მიმართებაში.
„ეს გამოიწვევს მშენებლობის პროცესში, ასევე შემდგომ ოპერირების პროცესში რამდენიმე ათასი სამუშაო ადგილის შექმნას, რომელიც საკმაოდ მნიშვნელოვანია ქვეყნისათვის და სოციალური პირობებისათვის. ეს არის საკმაოდ დიდი ნაბიჯი გადადგმული დღევანდელი მთავრობის მხრიდან, რომელიც გამოიწვევს რამდენიმე ასეული მილიონობით ლარის ინვესტირებას"- აცხადებს ბიზნესმენი.
შეგახსენებთ, რომ „საგადასახადო კოდექსში" შესატანი ცვლილების მიხედვით, ტურისტული საწარმოს საგადასახადო ვალდებულებების შესრულების მექანიზმები მარტივდება. ფინანსთა მინისტრის, ნოდარ ხადურის განმარტებით, ცვლილებები ხელს შეუწყობს სასტუმრო ბიზნესის განვითარებას, ქვეყნის ტურისტული პოტენციალის გაძლიერებას. ტურისტული ბიზნესის განვითარების ფარგლებში ახალი ინფრასტრუქტურისა და სამუშაო ადგილების შექმნას.
„საქართველოს კურორტებზე უკვე განვითარდა ისეთი მიმართულება, როგორიცაა ტურისტული ობიექტის აშენება და ცალკეული ნომრების გაყიდვა. ამავე დროს მფლობელებს საშუალება ეძლევათ, რომ დარჩენილ პერიოდში, როცა ამ ნომრებით თავად არ სარგებლობენ, გააქირაონ. ხდება შეღავათების დაწესება, ხდება გამარტივება და ვფიქრობთ, რომ ამ გზით გავამარტივებთ ტურისტული ობიექტების მშენებლობას.
