რუსეთის პრეზიდენტმა დიმიტრი მედვედევმა მოსკოვის მეტროპოლიტენში მომხდარ ტერაქტებთან დაკავშირებით მოწყობილ საგანგებო თათბირზე განაცხადა, რომ ტერორის ჩახშობის ხაზი ბოლომდე და ყოველგვარი კომპრომისების გარეშე გაგრძელდება. "ტერორის ჩახშობის ხაზი და ტერორიზმთან ბრძოლა გაგრძელდება. ტერორისტების წინააღმდეგ მიმართული ოპერაციები ბოლომდე უკომპრომისოდ გაგრძელდება", _ განაცხადა მედვედევმა და დასძინა, რომ მოსკოვის მეტროპოლიტენში მომხდარი ეს "როგორც ჩანს ტერორისტული აქტიურობის გაგრძელებაა და სწორედ ამაზე აიგება ძირითადი საგამოძიებო ვერსია". აღსანიშნავია, რომ ამჟამად ქალაქ მოსკოვში გეგმა "ვულკანი" მოქმედებს, რომლის ფარგლებშიც მეტროპოლიტენის ყველა სადგური მოწმდება. შეგახსენებთ, რომ მოსკოვის მეტროში დღეს დილით, 29 მარტს, ორი აფეთქება მოხდა. პირველი აფეთქება მეტროსადგურ "ლუბიანკაზე" 07:56 საათზე, მეორე კი "პარკ კულტურიში" 08:39 საათზე დაფიქსირდა. აღნიშნულთან დაკავშირებით სამართალდამცავები უკვე რამდენიმე ვერსიას ამუშავებენ. მოსკოვის პროკურორის იური სიომინის განცხადებით, არ არის გამორიცხული, რომ აფეთქებები თვითმკვლელი ტერორისტების მიერ განხორციელებულიყო. დაღუპულთა შესახებ ინფორმაცია ყოველ წუთს იცვლება. ამ დროისთვის 37 გარდაცვლილის შესახებ საუბრობენ, რომელთა შორის არიან როგორც მეტროს მატარებელში, ისე სადგურის პლატფორმაზე მყოფი მოქალაქეებიც. გარდაცვლილების გარდა არიან დაშავებულებიც. ამ დროისთვის მოსკოვის სხვადასხვა საავადმყოფოში 20-ზე მეტი მოქალაქეა გადაყვანილი. აღსანიშნავია, რომ მათი სამედიცინო დაწესებულებებში ტრანსპორტირება ვერტმფრენებით ხდება, რადგან რუსეთის დედაქალაქის ცენტრალურ ნაწილში გზები პარალიზებულია. აღსანიშნავია, რომ მომხდარ აფეთქებებთან და გამოძიების მიმდინარეობასთან დაკავშირებით შესაბამისი უწყებების ხელმძღვანელებისგან ინფორმაცია უკვე მოისმინა რუსეთის პრეზიდენტმა დიმიტრი მედვედევმა.