აჭარის ტურიზმის დეპარტამენტი ვალდებულია, რომ სტატისტიკური ინფორმაციები გასცეს და ის ყველასთვის ხელმისაწვდომი იყოს, - მიიჩნევს ტურიზმის ეროვნული ადმინისტრაციის ყოფილი ხელმძღვანელი და ამჟამად კავკასიის უნივერსიტეტის ტურიზმის სკოლის დეკანი და იმავდროულად ტურისტული კომპანია Protravel -ის დამფუძნებელი მაია სიდამონიძე.
„ისინი ვალდებულნი არიან, რომ ასეთი ინფორმაცია გამჭვირვალე და ყველასთვის ხელმისაწვდომი იყოს. მეორეს მხრივ, გასაგებია, რომ სეზონი გარკვეულწილად შეაჯამო, მაგრამ თვიური კვლევების ჩატარება მნიშვნელოვანია, რომ ვიცოდეთ თუნდაც მაღალი სეზონის პერიოდში ივნისში რამდენი ტურისტი იყო, ივლისსა და აგვისტოში. რათა გვქონდეს წინა წელთან შედარების უნარი და ყოველთვიურად ვიცოდეთ რა მდგომარეობაა ვიზიტორების ზრდის თუ კლების კუთხით. შემდეგ შესაძლებელია ბოლოში შეჯამდეს, როგორც სეზონი, მაგრამ რაოდენობა თვეების მიხედვით უნდა იყოს დათვლილი. ეს აუცილებელია. ფაქტს არანაირი ახალი მეთოდოლოგიები არ ამართლებს"- აცხადებს სიდამონიძე.
კავკასიის უნივერსიტეტის ტურიზმის სკოლის დეკანი ეჭვობს, რომ სტატისტიკის მეთოდოლოგიის ცვლილებით, აჭარის ტურიზმის დეპარტამენტს შესაძლოა გარკვეული, ნეგატიური ინფორმაციის დამალვა სურს.
„არ ვიცი, შესაძლოა გარკვეული თვეების დაფარვა უნდათ, თუნდაც ის, რომ აღმოჩნდეს რომ ივნისი-ივლისი შედარებით ნაკლები იყოს ვიდრე წინა წლები, შესაძლოა არ უნდოდეთ ამ ინფორმაციის გავრცელება და შეფუთავენ, როგორც სეზონურს. ეს ჩემი ვარაუდია, მაგრამ რომ იყოს ნაკლები რაოდენობა, ყველაფერი ხდება, მერე რა? არ შეიძლება ინფორმაციის დამალვა"- აცხადებს სიდამონიძე.
აღსანიშნავია, რომ აჭარის ტურიზმისა და კურორტების დეპარტამენტი სასტუმროთა დატვირთულობის მაჩვენებელის შესახებ ინფორმაციას აღარ გასცემს. როგორც უწყებაში განმარტავენ, რეგიონში შესული ტურისტების აღრიცხვა, 2014 წლის მაისამდე, ძირითადად სასტუმროების დატვირთვის კოეფიციენტზე დაყრდნობით ხდებოდა. უწყების გადწყვეტილებით, კი მათ მიერ ყოველთვიური სტატისტიკა აღარ გაიცემა, რადგანაც დეპარტამენტი სეზონური სტატისტიკური ანგარიშის სისტემაზე გადავიდა.
„აჭარის ტურიზმისა და კურორტების დეპარტამენტი რეგიონში შემოსული ტურისტების აღრიცხვას ძირითადად სასტუმროების დატვირთვის კოეფიციენტზე დაყრდნობით, 2014 წლის მაისამდე აწარმოებდა. ზაფხულის დაწყებასთან ერთად მივიღეთ გადაწყვეტილება სეზონური სტატისტიკური ანგარიშის შემოღების შესახებ. თქვენს მიერ მოთხოვნილი იანვარ-ივლისის სასტუმროთა დატვირთულობის სტატისტიკურ მონაცემებს 2014 წლის ზაფხულის ბოლოს, სეზონის შეჯამების შემდეგ, სექტემბრის თვეში მოგაწვდით. აქვე გვსურს გაცნობოთ, რომ ტურიზმის დეპარტამენტში მიმდინარეობს მუშაობა სტატისტიკის წარმოების ახალი მეთოდოლოგიის შემუშავებაზე, რომელიც სხვადასხვა კვლევებს დაეფუძნება და კერძო სექტორში განთავსებულ ტურისტთა აღრიცხვას შეძლებს. ასევე აღსანიშნავია, რომ ჩვენი ინფორმაციით, აგვისტოს თვეში რეგიონის სასტუმროები სრული დატვირთვით მუშაობს"- განუცხადეს „ჯი-ეიჩ-ენს" აჭარის ტურიზმის დეპარტამენტში, ოფიციალური წერილის პასუხად, რითაც ახალი ამბების სააგენტო მიმდინარე პერიოდისათვის სასტუმროთა დატვირთულობის მაჩვენებლებს ითხოვდა.
აჭარის ტურიზმის დეპარტამენტში განმარტავენ, რომ აჭარაში სასტუმროთა უმეტესი ნაწილი წინასწარაა დაჯავშნილი. ტურიზმის დეპარტამენტის პროგნოზით, 2014 წლის 9 ქვეყანაში წარმოებული სარეკლამო კამპანიებისა და გაორმაგებული საჰაერო ფრენების შედეგად უცხოელ ტურისტთა 10-15 %-მდე ზრდაა ნავარაუდევი.
