ფინანსთა მინისტრმა ნოდარ ხადურმა თბილისში მიმდინარე ყოველწლიური შეკრების - „ამბასადორიალი 2014"-ის ფარგლებში სიტყვით გამოსვლისას საზღვარგარეთ საქართველოს დიპლომატიური წარმომადგენლობების ხელმძღვანელებს ქვეყნის ძირითადი ეკონომიკური ტენდენციები გააცნო.
ფინანსთა მინისტრის ინფორმაციით, 2014 წლის პირველი ექვსი თვის მთლიანი შიდა პროდუქტის საშუალო რეალურმა ზრდამ წინასწარი მონაცემებით 6%, ხოლო პირველი კვარტალის ეკონომიკური ზრდის მაჩვენებელმა 7.1 % შეადგინა. ყველაზე სწრაფად მრეწველობა 16.7 %-ით, მშენებლობა 14 %-ით, ხოლო ვაჭრობა 11.1 %-ით გაიზარდა. ნოდარ ხადურის განცხადებით, მიმდინარე წლის ეკონომიკურ ზრდაში წარმმართველი კერძო სექტორია.
ფინანსთა მინისტრმა, ყურადღება ბიუჯეტის საგადასახადო შემოსავლებზე გაამახვილა და აღნიშნა, რომ 2014 წლის 7 თვის მონაცემებით, ნაერთი ბიუჯეტის ფაქტიური საგადასახადო შემოსავლები საპროგნოზო მაჩვენებლებს 2,5 %-ით, ხოლო წინა წლის შესაბამისი პერიოდის ფაქტიურ მაჩვენებელს 11.2 %-ით აჭარბებს.
საკუთარ გამოსვლაში ფინანსთა მინისტრი საგარეო ვაჭრობის საკითხსაც შეეხო და მიმდინარე წლის პირველ ნახევარში ექსპორტის 15 %-იან და იმპორტის 16 %-იან ზრდაზე ისაუბრა, მათ შორის განსაკუთრებით მნიშვნელოვნად მან ევროკავშირის ქვეყნებში ექსპორტის 45 %-ით გაზრდა შეაფასა.
ფინანსთა მინისტრმა ამბასადორიალზე სიტყვით გამოსვლისას მთავრობის მიერ დამტკიცებული ეკონომიკური განვითარების სტრატეგიის „საქართველო 2020"-ის შესახებაც ისაუბრა. „აღნიშნული დოკუმენტის მთავარი ამოცანა ინკლუზიური ეკონომიკური ზრდის ხელშეწყობაა. სტრატეგია, რომელზეც ჩვენ პარტნიორებთან ერთად ვიმუშავეთ ქვეყანის სოციალ-ეკონომიკური რეფორმების საფუძველს წარმოადგენს და ადამიანური კაპიტალის განვითარებას, კონკურენტუნარიანობის ზრდას და ფინანსებზე ხელმისაწვდომობის გაუმჯობესებას ეფუძნება," - განაცხადა ნოდარ ხადურმა.
გამოსვლის ნაწილი ფინანსთა სამინისტროს საქმიანობის ძირითადი მიმართულებებზე საუბარს დაეთმო, ბიუჯეტის შესრულების კუთხით არსებულ ვითარებასთან დაკავშირებით, მინისტრმა განაცხადა, რომ 2014 წლის 6 თვეში ნაერთი ბიუჯეტის საგადასახადო შემოსავლებმა (დაბრუნებული დაუბეგრავი მინიმუმის თანხის გათვალისწინებით) 354,0 მლნ ლარით (11%-ით) გადააჭარბა წინა წლის ანალოგიურ მაჩვენებელს; გადაჭარბებამ დაგეგმილ მაჩვენებელთან შეადგინა 212,5 მლნ ლარი; დაუბეგრავი მინიმუმის სახით დაბრუნებულია 125 მლნ ლარი (დაუბრუნდა 450 200 ფიზიკურ პირს);
„ფინანსთა სამინისტრო აღარ განიხილავს გადასახადის გადამხდელს როგორც ობიექტს, რომლის ხარჯზეც უნდა შესრულდეს შემოსავლები. ჩვენთვის გადასახადის გადამხდელი არის პარტნიორი რომელთან ერთადაც ვასრულებთ სოციალურ ვალდებულებებს და მოსახლეობას მივაწვდით სახელმწიფოს სერვისებს. გადასახადის გადამხდელი უნდა ამაყობდეს, რომ მან წვლილი შეიტანა გარკვეული რაოდენობის პენსიონერისათვის პენსიის გადახდაში და არ უნდა ჰქონდეს განცდა, რომ შემოსავლების სამსახურმა წაართვა სიმწრით ნაშოვნი შემოსავალი. ასეთი დამოკიდებულების დამკვიდრება გრძელვადიანი პროცესია და მას წინ უნდა უსწრებდეს სახელმწიფო ფინანსების გამჭირვალობა და ანგარიშვალდებულება," - განაცხადა ფინანსთა მინისტრმა.
რაც შეეხება ქვეყნის საგადასახადო პოლიტიკას, მინისტრის განცხადებით, საქართველოსა და ევროკავშირს შორის ღრმა და ყოვლისმომცველი თავისუფალი ვაჭრობის შეთანხმების ფარგლებში განხორციელდება საბაჟო და საგადასახადო (დღგ, აქციზი) კანონმდებლობის ევროკავშირის კანონმდებლობასთან ჰარმონიზაცია, გამარტივდება საბაჟო წესები და პროცედურები, გადასახადის ადმინისტრირება, ასევე, განხორციელდება საგადასახადო სანქციების ოპტიმიზაცია. საბაჟო ადმინისტრირების კუთხით დაგეგმილ ღონისძიებებზე საუბრისას, მინისტრმა აღნიშნა, რომ განხორციელდება თურქეთთან, აზერბაიჯანთან და სომხეთთან საბაჟო-გამშვები პუნქტების ერთობლივი მართვა. შედეგად, კი მნიშვნელოვნად გაძლიერდება კონტროლის ეფექტურობა და შემცირდება საზღვრის გადაკვეთისათვის აუცილებელი პროცედურების ხანგრძლივობა და მასთან დაკავშირებული ხარჯები; ნარკოტიკების უკანონო გადატანასთან ბრძოლის ეფექტურობის ამაღლების მიზნით კი 2014 წლის ბოლომდე ყველა საბაჟო-გამშვებ პუნქტზე იფუნქციონირებს კინოლოგიის სამსახური.
სახელმწიფო ვალთან დაკავშირებით ფინანსთა მინიტრმა განმარტა, რომ მთავრობის ვალი მთლიან ეკონომიკასთან მიმართებაში სტაბილურობით ხასიათდება და 2014 წლის ბოლოსათვის, სავარაუდოდ, მშპ-ს 35.4 პროცენტის დონეზე იქნება. აქედან, საგარეო ვალი იქნება 26.7, ხოლო საშინაო ვალი 8.7 პროცენტი. აღნიშნული მაჩვენებელი სახელმწიფო ვალის კრიტიკულ მაჩვენებლისგან საკმაოდ შორსაა.
ფინანსთა სამინისტროს საერთაშორისო სავალუტო ფონდთან თანამშრომლობაზე საუბრისას კი ნოდარ ხადურმა ყურადღება გაამახვილა მიმდინარე წლის 31 ივლისს საერთაშორისო სავალუტო ფონდის აღმასრულებელი საბჭოს მიერ დამტკიცებულ 36 თვიანი (100 მლნ SDR) საქართველოს მთავრობის ეკონომიკური მხარდაჭერის პროგრამაზე.
ფინანსთა მინისტრმა საკუთარ გამოსვლაში ასევე ისაუბრა ქვეყნის საკრედიტო რეიტინგებზე, დონორ ორგანიზაციებთან ურთიერთობებზე და OECD-ის მიერ საქართველოს საგადასახადო კანონმდებლობის საერთაშორისო სტანდარტების შესაბამისად აღიარებაზე.
