მთავრობის გადაწყვეტილებით, სამთავრობო პროგრამა - „აწარმოე საქართველოში", გარკვეული ცვლილებები შევიდა და პროგრამაში მონაწილეობის მსურველთათვის განხორციელდა. უფრო კონკრეტულად კი პროგრამის ფარგლებში ხდება ფინანსურ რესურსებზე ხელმისაწვდომობის გამარტივება, უძრავი ქონებით უზრუნველყოფა და საკონსულტაციო მომსახურების გაწევა.
საქართველოს ეკონომიკისა და მდგრადი განვითარების მინისტრის მოადგილის ქეთევან ბოჭორიშვილის განმარტებით, პროგრამის კომპონენტების ეფექტურობამ და წარმატებამ განაპირობა ცვლილების ინიცირება მთავრობის დადგენილებაში, რათა საბოლოო ჯამში ბენეფიციართა რიცხვი. გაიზარდოს.
„2014 წლის ივნისიდან საქართველოს ეკონომიკისა და მდგრადი განვითარების სამინისტრო და სოფლის მეურნეობის სამინისტრო ახორციელებენ პრემიერ-მინისტრის ინიციატივით შექმნილ ახალ სამთავრობო პროგრამას „აწარმოე საქართველოში", რომლის მიზანია საქართველოში მეწარმეობის განვითარება, მეწარმე-სუბიექტების მხარდაჭერა, ახალი საწარმოების შექმნის ხელშეწყობა, ამასთანავე კერძო სექტორის კონკურენტუნარიანობისა და საექსპორტო პოტენციალის ზრდა.
შესაბამისად, პროგრამის ფარგლებში ხდება ფინანსურ რესურსებზე ხელმისაწვდომობის გამარტივება, უძრავი ქონებით უზრუნველყოფა და საკონსულტაციო მომსახურების გაწევა"-აღნიშნა ბოჭორიშვილმა.
მისივე ინფორმაციით, ცვლილებების თანახმად, მოიხსნა სესხის მოცულობის ზედა ზღვარი, რომელიც გახლდათ 2 მლნ აშშ დოლარი.
ასევე, ამ ცვლილებების თანახმად, მოხდება არამხოლოდ დამწყები საწარმოების ხელშეწყობა, არამედ არსებული ბიზნესების გაფართოება. დღეიდან უკვე დაინტერესებულ მეწარმეებს შეეძლებათ მიმართონ ბანკს და ისარგებლონ სესხზე შეღავათიანი პირობებით, რათა მოახდინონ არსებული ბიზნესის გაფართოება ან გადაიარაღება. აღნიშნული აამაღლებს არსებული საწარმოების პროდუქტიულობას და მათ მიერ წარმოებული პროდუქციის კონკურენტუნარიანობას.
„ამასთანავე, 2014 წლის სექტემბრიდან მეწარმეობის განვითარების სააგენტო სამთავრობო ინიციატივის, „აწარმოე საქართველოში"-ს ფარგლებში იწყებს სახალხო პროგრამის განხორციელებას, რისი საშუალებითაც მოხდება მიკრობიზნესის წახალისება საქართველოს ყველა რეგიონში"- აცხადებს ბოჭორიშვილი.
მიკრობიზნესის წახალისების პროგრამის განსახორციელებლად გამოყოფილია 20 მლნ ლარი, რომლის ფარგლებშიც მოხდება 3200 მეწარმის ხელშეწყობა საქართველოს ყველა რეგიონში. აღნიშნული უზრუნველყოფს 4600 ახალი სამუშაო ადგილის შექმნას.
პროგრამის შედეგად მოხდება ადგილობრივი მეწარმეების კონკურენტუნარიანობის გაუმჯობესება, შემცირდება რეგიონის მკვიდრთა მიგრაცია, რეგიონებში დამკვიდრდება თანამედროვე ბიზნესპრაქტიკა და ადგილობრივ დონეზე მოხდება შემოსავლების ათვისება.
პროგრამა მოიცავს როგორც ფინანსური დახმარების, ისე ბიზნესის მართვის უნარების გაუმჯობესების კომპონენტებს.
როგორც ცნობილია, ფინანსური დახმარების კომპონენტი გულისხმობს დამწყები მეწარმეებისთვის 5 000 ლარის ოდენობის თანამონაწილეობრივი დაფინანსების გამოყოფას, ხოლო მეწარმეთა ჯგუფის შემთხვევაში მაქსიმალური თანხა 15 000 ლარია. ფინანსური დახმარების მიმღების თანამონაწილეობრივი წილი 20%-ს შეადგენს.
„ბიზნესის მართვის უნარების გაუმჯობესების კომპონენტის ფარგლებში, ფინანსური დახმარების ბენეფიციარ მეწარმეებს უსასყიდლოდ გაეწევათ პროფესიუნალური ბიზნესკონსულტაციები, საკვალიფიკაციო ტრენინგები და ინდივიდუალური კონსულტაციები"- აცხადებს ეკონომიკისა და მდგრადი განვითარების მინისტრის მოადგილე.
