დღეს, თბილისში, სასტუმრო "ბეტსიში" არასრულწლოვანთა დაცვის თემაზე ოთხდღიანი ტრენინგი დასრულდა. სწავლება, რომელიც მიზნად ისახავდა საზოგადოებრივი და კერძო ადვოკატების ინფორმირებას არასრუწლოვანთა მართლმსაჯულების პრაქტიკული საკითხების შესახებ, ევროკავშირის, გაეროს ბავშვთა ფონდისა (UNICEF) და ნიდერლანდების სამეფოს საელჩოს ერთობლივი ძალისხმევით ჩატარდა.
როგორც "ჯი-ეიჩ-ენს" სასჯელაღსრულების, პრობაციისა და იურიდიული დამხარების სამინისტროდან აცნობეს, ტრენინგს სამართლებრივი ექსპერტი - ქალბატონი ჰოლტა ზაჩაი უძღვებოდა. მან ადვოკატებს გააცნო ისეთი მნიშვნელოვანი საკითხები, როგორებიცაა ადვოკატისა და არასრულწლოვანი კლიენტის ურთიერთობები, კანონთან კონფლიქტში მყოფ არასრულწლოვანთან კონტაქტი, პირველი გასაუბრება, ურთიერთობა ადვოკატსა და არასრულწლოვანი კლიენტის მშობლებს შორის, არასრულწლოვანი ეჭვმიტანილისა და დაზარალებულის დაკითხვა, ასევე - დაცვის სტრატეგია და გასაჩივრებისათვის მომზადება. თეორიულ მასალაზე მუშაობასთან ერთად, ტრენინგის მონაწილეებმა დისკუსიები და როლური თამაშები გამართეს.
დღესვე სასჯელაღსრულების, პრობაციისა და იურიდიული დახმარების საკითხთა სამინისტროს იურიდიული დახმარების სამსახურის დირექტორმა - ბატონმა ირაკლი კობიძემ და ნიდერლანდების სამეფოს ელჩის მოადგილემ - ბატონმა ჰეინო ვან ჰოველინგენმა ტრენინგის მონაწილეებს სწავლების წარმატებით დასრულება მიულოცეს და სერტიფიკატები გადასცეს.
აღსანიშნავია, რომ საქართველო არის გაეროს ბავშვთა უფლებების კონვენციის ხელშემკვრელი სახელმწიფო. კონვენცია წევრ სახელმწიფოებს არასრულწლოვანთა მართლმსაჯულების სრულყოფილი სისტემის შემუშაოვებასა და დანერგვას ავალდებულებს. 2009 წელს საქართველოს მთავრობამ საერთაშორისო პარტნიორებთან ერთად არასრულწლოვანთა მართლმსაჯულების სისტემის რეფორმის სტრატეგია შეიმუშავა. სტრატეგიის ერთ-ერთი ძირითადი მიმართულებას არასრულწლოვანთა მართლმსაჯულების სისტემაში ადამიანური რესურსების განვითარება წარმოადგენს.
