როგორც "ჯი-ეიჩ-ენს" საგარეო უწყებიდან აცნობეს, დაგეგმილია საველე გასვლა ევროკავშირის სადამკვირვებლო მისიის წარმომადგენლებთან ერთად.

შეგახსენებთ, რომ ლიტვის საგარეო საქმეთა მინისტრი საქართველოში გუშინ ჩამოვიდა. ის უკვე შეხვდა პარლამენტის თავმჯდომარე დავით ბაქრაძეს.

ხვალ, 29 მარტს კი, 10:35 საათზე, აუდრონიუს აჟუბალისი საქართველოს ერთიანობისთვის დაღუპულ გმირთა მემორიალს მოინახულებს და პატივს მიაგებს მათ ხსოვნას. 11:00 საათზე მას საქართველოს საგარეო საქმეთა მინისტრი გრიგოლ ვაშაძე მიიღებს, რის შემდეგაც ერთობლივ პრესკონფერენციას გამართავენ.

17:00 საათზე ლიტვის საგარეო საქმეთა მინისტრი საბჭოთა ოკუპაციის მუზეუმს მოინახულებს.

აუდრონიუს აჟუბალისი შეხვედრებს გამართავს ასევე საქართველოს პრეზიდენტ მიხეილ სააკაშვილთან, საქართველოს პრემიერ-მინისტრ ნიკოლოზ გილაურთან, ვიცე-პრემიერთან, სახელმწიფო მინისტრთან რეინტეგრაციის საკითხებში თემურ იაკობაშვილთან, ასევე პოლიტიკური პარტიების წარმომადგენლებთან.