დღეს, 26 მარტს, საქართველოში პირველად მდგრადი ენერგეტიკის დღე აღინიშნება, რომელიც მდგრადი ენერგეტიკის ევროპული კვირეულის ფარგლებში ტარდება.
ღონისძიების ორგანიზატორია კავშირი "ენერგოეფექტურობის ცენტრი საქართველო", მხარდამჭერები _ BP და მისი პარტნიორები ნავთობისა და გაზის პროექტებში და აშშ საერთაშორისო განვითარების სააგენტო (USAID).
საქართველოს მდგრადი ენერგეტიკის დღის ფარგლებში დაგეგმილ ღონისძიებებში მონაწილეობას მიიღებენ სათბობ-ენერგეტიკისა და გარემოს დაცვისა და ბუნებრივი რესურსების სამინისტროების, აგრეთვე თბილისის მერიის წარმომადგენლები, დონორი ორგანიზაციების, სამეცნიერო და არასამთავრობო ორგანიზაციების წევრები.
მოსახლეობის ცნობიერების ამაღლების, განახლებადი ენერგიების, ენერგოდამზოგი ტექნოლოგიების და ენერგოეფექტურ ღონისძიებათა პოპულარიზების მიზნით, ევროკავშირში 2005 წლიდან ყოველწლიურად იმართება მდგრადი ენერგეტიკის კვირეული.
"საქართველო აღიარებს ევროპულ ღირებულებებს როგორც ზოგადად, ასევე ამ კონკრეტულ თემატურ არეალში, ასე რომ, გადავწყვიტეთ შევუერთდეთ მდგარი ენერგეტიკის კვირეულს. დაგეგმილი გვაქვს, საქართველოში მდგრადი ენერგეტიკის დღე ყოველწლიურად ჩავატაროთ", - აცხადებს საქართველოს მდგრადი ენერგეტიკის დღის ორგანიზატორი კავშირის "ენერგოეფექტურობის ცენტრი საქართველოს", _ აცხადებს ენერგოეფექტურობის ცენტრის დირექტორი გიორგი აბულაშვილი.
მდგრადი ენერგეტიკის დღის ფარგლებში თბილისის სასტუმრო "შერატონ მეტეხი პალასში" დაგეგმილია თემატური კონფერენციის ჩატარება, რომელშიც მონაწილეობას მიიღებენ საქართველოს ტექნიკური უნივერსიტეტის პროფესორ-მასწავლებლები და სტუდენტები, დონორი ორგანიზაციების, შესაბამისი სამთავრობო და არასამთავრობო სექტორის წარმომადგენლები.
საქართველოს მდგრადი ენერგეტიკის დღე დასრულდება როკ-ჯგუფ "ვაკის პარკის" კონცერტით, რომელიც გაიმართება კლუბ "33 ა"-ში. კონცერტის მსვლელობისას მოხდება პროექტის "ენერგოეფექტურობის პროგრამა საქართველოს თემებისათვის - ენერგოავტობუსის" ფარგლებში საქართველოს ჟურნალისტებისთვის ჩატარებულ კონკურსში (საუკეთესო ტელერადიორეპორტაჟი, საუკეთესო საგაზეთო რეპორტაჟი) გამარჯვებულთა საზეიმო დაჯილდოება.
