შეხვედრაზე, რომელიც სტრასბურგში, ევროსაბჭოს სათავო ოფისში, გაიმართა, იუსტიციის მინისტრმა და გენერალურმა მდივანმა ის რეფორმები განიხილეს, რომელთაც სათავეში საქართველოს იუსტიციის სამინისტრო უდგას.

ტორბიორნ იაგლანდმა თეა წულუკიანთან საუბრისას აღნიშნა, რომ ის მაღალ შეფასებას აძლევს საქართველოს იუსტიციის სამინისტროს მიერ განხორციელებულ რეფორმებს, რომლებიც ქვეყნის ევროპულ ღირებულებებთან მიახლოებას ისახავს მიზნად. შეხვედრაზე განხილულ იქნა ევროსაბჭოსა და საქართველოს მთავრობასთან, მათ შორის, იუსტიციის სამინისტროსთან, მომავალი თანამშრომლობისა და მხარდაჭერის გზები.

საუბარი შეეხო 2014 წლის 15 ივნისის ადგილობრივი თვითმმართველობის არჩევნებსაც. გენერალურმა მდივანმა, ასევე, დადებითად შეაფასა საქართველოში ჩატარებული თვითმმართველობის არჩევნები. როგორც აღინიშნა, მიუხედავად იმისა, რომ ეს იყო ყველაზე კომპლექსური არჩევნები, რომელიც საქართველოს დამოუკიდებლობის შემდეგ გაუმართავს, იგი გამჭვირვალედ და დემოკრატიულად ჩატარდა.