მსოფლიო ბანკის რეგიონულმა დირექტორმა სამხრეთ კავკასიაში ჰენრი კერალიმ ერთობლივი პროექტების წარმატებით განხორციელებისთვის საქართველოს სამთავრობო უწყებებს - ფინანსთა სამინისტროსა და რეგიონული განვითარებისა და ინფრასტრუქტურის სამინისტროს, ასევე მუნიციპალური განვითარების ფონდს მსოფლიო ბანკის ევროპისა და ცენტრალური აზიის რეგიონში ვიცე-პრეზიდენტის ჯილდო გადასცა.
აღნიშნული ჯილდო უწყებების ხელმძღვანელებს - ფინანსთა მინისტრს, ნოდარ ხადურს, რეგიონული განვითარებისა და ინფრასტრუქტურის მინისტრს ელგუჯა ხოკრიშვილს და მუნიციპალური განვითარების ფონდის დირექტორს გადაეცათ.
დაჯილდოვების ცერემონიას დაესწრო ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი.
აღმოსავლეთ ევროპისა და ცენტრალური აზიის რეგიონიდან ჯილდოზე წარდგენილი იყო 80 პროექტი, რომელთაგან შეირჩა 16 საუკეთესო.
მსოფლიო ბანკმა ერთ-ერთ წარმატებულ პროექტად „კახეთის რეგიონული განვითარების პროექტი" დაასახელდა, რომელსაც მსოფლიო ბანკის მხრიდან, მდგრადი განვითარების პროგრამების კოორდინატორი სამხრეთ კავკასიაში აჰმედ აივეიდა უძღვებოდა.
„მოხარული ვარ, რომ ჩვენი ხელისუფლების პირობებში აღნიშნულმა პროექტმა მსოფლიო ბანკის მოწონება დაიმსახურა. მსურს მადლობა გადავუხადო ჩვენს პარტნიორებს იმ აღიარებისთვის, რომელიც საქართველოს მთავრობამ, ფინანსთა სამინისტრომ, ჩვენმა კოლეგებმა რეგიონული განვითარებისა და ინფრასტრუქტურის სამინისტროდან, მუნიციპალური განვითარების ფონდიდან დაიმსახურეს „კახეთის რეგიონული განვითარების პროგრამის" განხორციელებისთვის. მნიშნელოვანია, რომ უკვე ვიწყებთ ახალ პროექტებს იმერეთში, ასევე მცხეთა-მთიანეთსა და სამცხე-ჯავახეთში. იმედი მაქვს, რომ მსოფლიო ბანკთან ჩვენ წარმატებულ თანამშრომლობას გავაგრძელებთ," - განაცხადა ფინანსთა მინისტრმა ნოდარ ხადურმა.
„შევიკრიბეთ, რათა ვიზეიმოთ კახეთის რეგიონული განვითარების პროექტის წარმატება. ჩვენ აქტიურად ვთანამშრომლობთ საქართველოსთან. ბოლო წლებში მთელი ქვეყნის მასშტაბით, მნიშვნელოვნადაა გაზრდილი ტურისტების რაოდენობა, მათ შორის, კახეთის რეგიონში. მნიშნელოვანია, რომ აღნიშნული პროექტის მეშვეობით, ადგილობრივ მოსახლეობას გაუჩნდა ახალი ეკონომიკური შესაძლებლობები," - აღნიშნა მსოფლიო ბანკის რეგიონულმა დირექტორმა სამხრეთ კავკასიაში ჰენრი კერალიმ.
„ბოლო 2 წლის განმავლობაში ამ პროექტის ფარგლებში, ჩვენმა სამინისტრომ და მუნიციპალური განვითარების ფონდმა აქტიურად ვითანამშრომლეთ მსოფლიო ბანკთან. აქედან გამომდინარე, წელს აღნიშნულმა საერთაშორისო საფინანსო ინსტიტუტმა „კახეთის რეგიონული განვითარების პროექტი" 80 პროექტს შორის შეარჩია და ჯილდო გადმოგვეცა მსოფლიო ბანკსა და სახელმწიფოს შორის წარმატებული პარტნიორობისა და გუნდური მუშაობისთვის, - აღნიშნა რეგიონული განვითარებისა და ინფრასტრუქტურის მინისტრმა ელგუჯა ხოკრიშვილმა.
„მსოფლიო ბანკი ერთ-ერთ მნიშნელოვან როლს თამაშობს ქვეყანაში ტურიზმის განვითარებისთვის. „კახეთის რეგიონული განვითარების პროექტი" მოიცავდა როგორც საჯარო სექტორის რეკონსტრუქციას, ისე კულტურული მემკვიდრეობის ძეგლების რეაბილიტაციას და მათ მომზადებას ტურიზმის ბიზნესში ჩართვისთვის, რისთვისაც მადლობას ვუხდით ჩვენს პარტნიორებს მსოფლიო ბანკიდან," - განაცხადა ვიცე-პრემიერმა, ეკონომიკისა და მდგრადი განვითარების მინისტრმა გიორგი კვირიკაშვილმა.
აღნიშნული პროგრამა მიზნად ისახავდა კახეთის მოსახლეობის ცხოვრების დონის ამაღლებას, ინფრასტრუქტურის მშენებლობა-რეაბილიტაციის, მცირე ბიზნესის ხელშეწყობის, ტურიზმის სექტორისა და სოფლის მეურნეობის განვითარების გზით.
