საქართველოს საგარეო საქმეთა სამინისტრო ოკუპანტების მიერ ახალგორის რაიონში საჯარო სკოლის დანგრევას ეთნიკური წმენდისა და დისკრიმინაციის პოლიტიკის გაგრძელებად აფასებს.
აღნიშნულთან დაკავშირებით გრიგოლ ვაშაძის უწყება სპეციალურ განცხადებას ავრცელებს.
"აღნიშნული ფაქტი წარმოადგენს რუსი ოკუპანტების მიერ ეთნიკური წმენდისა და დისკრიმინაციის პოლიტიკის გაგრძელებას და კიდევ ერთხელ ნათლად მეტყველებს, რომ რუსეთი იგნორირებას უწევს საერთაშორისო სამართლის საყოველთაოდ აღიარებულ ნორმებს, მათ შორის ადამიანის უფლებების ერთ-ერთ ფუძემდებელ უფლებას - მშობლიურ ენაზე მიიღოს განათლება", - ნათქვამია განცხადებაში.
საქართველოს საგარეო საქმეთა სამინისტრო რუსეთის საოკუპაციო ჯარების უკანონო ქმედებებთან დაკავშირებით პროტესტს გამოთქვამს და მოითხოვს შეწყდეს ოკუპირებულ რეგიონში მცხოვრები ქართველი და ოსი მოსახლეობის უფლებების დარღვევა.
სამინისტრო მოუწოდებს საერთაშორისო თანამეგობრობას მკაცრი შეფასება მისცეს აღნიშნულ ფაქტს და აიძულოს რუსეთის მხარე განუხრელად შეასრულოს აღებული საერთაშორისო ვალდებულებები.
შეგახსენებთ, რომ დღეს, რუსეთის საოკუპაციო ძალების სამხედრო მოსამსახურეებმა ოკუპანტებისთვის საცხოვრებელი სახლის აშენების მოტივით ახალგორში №3 სკოლა დაანგრიეს. სკოლის 150 ქართველი და ოსი მოსწავლე იძულებით გადაიყვანეს სხვა სკოლაში.
