ლეიბორისტული პარტია რუსთავში წყალზე დაწესებული ტარიფის შემცირებას ითხოვს.
პარტიის წევრის პაატა ჯიბლაძის მტკიცებით, ქვემო ქართლის ადმინისტრაციულ ცენტრში თითოეული ოჯახი წყლის მოხმარების სანაცვლოდ 3 ლარს იხდის.
"წყალი კი გადადუღების გარეშე სასმელად უვარგისია", - განმარტავს ჯიბლაძე, რომელიც შესაბამის რეაგირებას სემეკისგან მოითხოვს.
აღსანიშნავია, რომ ჯიბლაძემ ენერგეტიკის მარეგულირებელ კომისიაში რუსთავის სამი ათასი მცხოვრების განცხადება უკვე შეიტანა.
"ლეიბორისტების" განცხადებას დღესვე გამოეხმაურა სემეკის თავმჯდომარე. გურამ ჩალაგაშვილის განცხადებით, ამ საკითხზე მარეგულირებელი კომისია მხოლოდ იმ შემთხვევაში იმსჯელებს, თუკი ტარიფის გადახედვის მოთხოვნით მას რუსთავის წყალგამანაწილებელი კომპანია მიმართავს.
