"როგორც მე ვიცი, პატიმრებს, რომელთა გუანტანამოს ციხიდან საქართველოში ჩამოყვანა მოხდა, დანაშაული ვერ დაუმტკიცდა, უბრალოდ მათ თავად არ ისურვეს საკუთარ სამშობლოში დაბრუნება. აქედან გამომდინარე, მათ ჩვენს ქვეყანაში ჩამოყვანაში უარყოფითსა და განსაკუთრებულ რისკებს ვერ ვხედავ. სხვა სიტუაცია იქნებოდა, ისინი რომელიმე ისლამური ორგანიზაციის ლიდერები ან მძიმე დანაშაულებებისთვის გასამართლებულნი რომ ყოფილიყვნენ", - განუცხადა არეშიძემ "ჯი-ეიჩ-ენს" საქართველოში გუანტანამოს ციხის სამი პატიმრის ჩამოყვანის საკითხზე კომენტირებისას, რომლებიც აქ არასაპატიმრო რეჟიმში იცხოვრებენ.

ამასთან, არეშიძე აღნიშნულ საკითხზე შეერთებული შტატების ხელმძღვანელობასთან საქართველოს თანამშრომლობას დადებითად აფასებს და აცხადებს, რომ ეს ქვეყნებს შორის სტრატეგიულ ურთიერთობებს ხაზს უსვამს.

"უნდა აღინიშნოს, რომ საქართველოს გარდა ყველა დანარჩენ შემთხვევაში, გუანტანამოს ციხის პატიმრების გადანაწილება ისეთ ქვეყნებში მოხდა, მაგალითად პორტუგალიაში, ირლანდიაში და ა.შ, რომლებიც ნატოს სამოკავშირეო ხელშეკრულების წევრნი არიან", - განმარტა არეშიძემ.

შეგახსენებთ, რომ გუანტანამოს საპყრობილის სამი პატიმარი საქართველოში გუშინ ჩამოიყვანეს. საქართველოს შსს-ის ინფორმაციით, ისინი ციხეებში არ მოთავსდებიან და აქ თავისუფალ რეჟიმში იცხოვრებენ.